Быыбар үһүс күнэ түмүктэннэ

Өрөспүүбүлүкэтээҕи Киин быыбардыыр хамыыһыйа бэрэссэдээтэлэ Евгений Федоров бэҕэһээ киэһэ «Якутия 24» телевизионнай ханаал эфиригэр региоҥҥа үс күннээх куоластааһын түмүктэммитин туһунан иһитиннэрбитэ. 
«РФ Судаарыстыбаннай Думатыгар депутаттары, ону сэргэ Саха сирин икки быыбардыыр уокуругар парламеммытыгар депутаттары эбии талыыны уонна 76 муниципальнай быыбардары өрөспүүбүлүкэ 29 оройуоннарыгар үс күнү быһа ыытан түмүктээтибит. Бүгүн куолас ааҕытын саҕалыахпыт», – диэн эппитэ Евгений Федоров.
Кини бэлиэтээбитинэн, регионнааҕы Киин быыбардыыр хамыыһыйа дойду үрдүнэн бары быыбардыыр учаастактар үлэлэрэ түмүктэннэҕинэ биирдэ куоластааһын түмүгүн таһаарыы саҕаланар. Итини сэргэ, бэрэссэдээтэл олус көхтөөх, киирсиилээх быыбар буолан ааспытын эбэн эттэ. 
Балаҕан ыйын 17-18-19 күннэригэр араас таһымнаах быыбардар буолан аастылар. Саха сиригэр гражданнар РФ Судаарыстыбаннай Думатын депутаттарын, Университет 3 №-дээх биир мандаттаах уокуругун норуодунай депутаттарын талар, Халыма-Индигиир 3 №-дээх биир мандаттаах уокуругун уонна өссө 76 муниципальнай быыбар хампаанньаларыгар кытыннылар. 
Быыбар түмүктэрин салҕыы сырдата туруохпут.