Быыһыыр сулууспаны кытта куттала суох сынньалаҥ

Жатай бөһүөлэгэр баар «Орленок» чэбдигирдэр лааҕырга «Куттала суох сайын» тэрээһин чэрчитинэн аэромобильнай көрдүүр-быыһыыр этэрээт үлэһиттэрэ оҕолорго эмсэҕэлээбит киһиэхэ бастакы көмөнү хайдах оҥорорго маастар-кылааһы ыыттылар.  Кинилэр сүрэх-тыҥа реанимациятын оҥоруу бэрээдэгин көрдөрдүлэр, сиһилии быһаардылар.

Итиэннэ Быыһыыр сулууспа үлэһиттэрэ баһаартан сэрэхтээх буолуу быраабылаларын кытта билиһиннэрдилэр, баһаары умуруоруу туһунан кэпсээтилэр.  

Ити иннинэ сулууспа исписэлиистэрэ өрөспүүбүлүкэтээҕи коррекциялыыр оскуола-интэринээккэ сылдьан Үөһээ Дьааҥы ууга барбыт нэһилиэнньэлээх пууннарын оҕолорун кытта көрсүбүттэрэ, айылҕаҕа куттала суох сынньаныы уонна баһаартан сэрэхтээх буолуу туһунан кэпсээбиттэрэ уонна оҕолор билиилэрин бэрэбиэркэлиир викторинаны ыыппыттара.