Быраастар мобильнай биригээдэлэрэ хоту улуустарга үлэлииллэр

Саха сирин быраастарын көһө сылдьар биригээдэлэрин үлэтэ салҕанар.
“Ыам ыйын 13 күнүгэр элбэх хайысхалаах биригээдэлэр арктическай Анаабыр уонна уустук суоллаах-иистээх Уус-Маайа оройуоннарыгар көттүлэр, онно икки тыһыынча кэриҥэ киһи олорор тоҕус нэһилиэнньэлээх пууну хабар былааннаахтар. Ону таһынан оҕолору көрөр элбэх хайысхалаах биригээдэлэр Абый уонна Эдьигээн оройуоннарыгар көттүлэр. Биригээдэлэр ыам ыйын 24-26 күннэригэр диэри үлэлиэхтэрэ”,— диэн Өрөспүүбүлүкэтээҕи уопсастыбаннай доруобуйа уонна медицинскэй профилактика киинин кылаабынай бырааһа Алена Никитина иһитиннэрэр.
Ыам ыйын 14 күнүгэр тиис быраастарын бөлөҕө Үөһээ Халымаҕа айаннаата, кинилэр улуус бары нэһилиэннньэлээх пуунугар сылдьар былааннаахтар.
Санатан эттэххэ, өрөспүүбүлүкэ Арктика оройуоннарыгар уонна уустук суоллаах-иистээх улуустарга быраастар көһө сылдьар биригээдэлэрэ дойду бэрэсидьиэнэ Владимир Путин көҕүлээбит “Доруобуйа” национальнай бырайыак чэрчитинэн үлэлииллэр, диэн иһитиннэрэр Ил Дархан уонна Бырабыыталыстыба пресс-сулууспата.