Бырааһынньыктаабаппыт! Маассабай тэрээһиннэр тохтууллар

Бу нэдиэлэҕэ Саха сиригэр коронавирустаабыт киһи ахсаана элбээтэ, чуолаан аҕам саастаах дьон, оскуола үөрэнээччилэрэ, устудьуоннар ыалдьаллара үксээтэ. 

Роспотребнадзор Саха сиринээҕи салаата муус устар 20 күнүттэн ыам ыйын 8 күнүгэр диэри дьон тоҕуоруһар бырааһынньыктарын, спортивнай күрэхтэһиилэри, быыстапкалары, о.д.а. тэрээһиннэри тохтоторго сүбэлээтэ. Ону таһынан ыам ыйыгар уһун өрөбүллэргэ корпоративтары хааччахтыырга ыҥырда. Бу этиилэри ылынан, Ил Дархан Айсен Николаев муус устар 19 күнүгэр Саха сиригэр эбии хааччахтааһыннары киллэрэр туһунан ыйаахха илии баттаата.

Ол курдук, өрөбүллэргэ уонна бырааһынньык күннэригэр  өрөспүүбүлүкэ үрдүнэн конференциялары, форумнары, култуура, үөрэх тэрээһиннэрин ыытар бобулунна, ол эрээри онлайн формат көҥүллэнэр. Маннык тэрээһиннэр үлэ күнүгэр буолуохтарын сөп, кыттааччы ахсаана 50-тан элбиэ суохтаах.    

Ас-үөл тэрилтэлэрэ, ол иһигэр банкет саалалара муус устар 20 күнүттэн түүн 00:00  чаастан сарсыарда 06:00 чааска диэри сабыллаллар.   

Театрдарга, киинэ театрдарыгар, кэнсиэртэргэ, култуура дьиэлэригэр саала 50 % туолара көҥүллэнэр. Санатан эттэххэ, бу иннинэ 75 % тиийэ сылдьыбыта.