Былаан киэҥ, бириэмэ ыгым

Киин куорат олохтоохторо норуоттар икки ардыларынааҕы «Азия оҕолоро» оонньуулары долгуйа күүтэбит, чугаһаан истэҕин аайы өрөйөбүт-чөрөйөбүт. Ол тоҕото өйдөнөр: бу кэтэһиилээх тэрээһиммит ыытыллар сылыгар тапталлаах Дьокуускайбыт киэркэйэр, тупсар. Бэл диэтэр, куорат олоҕо биир кэм сэргэхсийэргэ дылы. Чахчыта, чугастан чуоҕуһар, ыраахтан ыксалаһар ыалдьыттары ох курдук оҥостон көрсөр буоллахпыт!

Күүтүүлээх тэрээһиммит саҕаланара ыйтан эрэ ордук кэм хаалла, бэлэмнэнии үлэтэ күүһүрэр. Ол курдук, элбэх кыбартыыралаах дьиэлэр уонна социальнай эбийиэктэр тас моһуоннара өрөмүөннэнэр, тупсарыллар. Бу үлэ барыта бэс ыйыгар түмүктэниэхтээх. Былаан киэҥ, бириэмэ ыгым.

Бэдэрээтчиттэр дьиэлэр илин өттүлэрин (фасадтарын) штукатуркалаан, эркиннэрин кырааскалыахтаахтар, баһаарынай кирилиэстэрин уларытыахтаахтар, уу сүүрэр турбаларын оҥоруохтаахтар, түннүктэри, киирэр ааннары уларытыахтаахтар, үктэллэри өрөмүөннүөхтээхтэр, балконнары өстүөкүлэлиэхтээхтэр.

Манна даҕатан эттэххэ, СӨ Бырабыыталыстыбата, СӨ Хапытаалынай өрөмүөнүн пуондата, Олохтоох дьаһалта бэрэстэбиитэллэрэ үлэ хаамыытын бэрэбиэркэлииллэр, ураты хонтуруолга туталлар. Бүтэһик дааннайынан, графиктан хаалыы бэлиэтэммэт.

«Үлэ барыта былаан быһыытынан ыытылла турар. Сорох дьиэлэр бас билээччилэрэ балконнарын өстүөкүлэлииртэн аккаастаналлара харгыс буолар. Олохтоохтор өйдүөхтэрин наада – дьиэлэр тас моһуоннара биир истииллээх өрөмүөннэннэхтэринэ, тупсаҕай көстүүлээх буолуохтара этэ», – диэбитэ бу иннинэ Саха сирин вице-премьерэ Дмитрий Садовников.

Олохтоох дьаһалта пресс-сулууспатыгар иһитиннэрбиттэринэн, бүтэһик чахчынан «Азия оҕолоро» оонньуулары көрсө киин куорат дьаһалтатын былаанынан 29 элбэх кыбартыыралаах дьиэ уонна 7 социальнай эбийиэк илин өттө (фасада) өрөмүөннэниэхтээх (өссө эбиллиэн сөп). СӨ Хапытаалынай өрөмүөнүн пуондатын бырагырааматынан 9 дьиэҕэ үлэ ыытыллыахтаах (бу сыыппара өссө элбиирэ күүтүллэр). Биллэн турар, манна киин уулуссаларга уонна күрэхтэһиилэр буолар сирдэриттэн чугас турар дьиэлэр хабыллаллар.

7 административнай дьиэҕэ өрөмүөн үлэтэ ыытыллыахтаах: Ф.И. Авдеева аатынан Оҕо айымньытын дыбарыаһа, 16-с, 7-с, 9-с, 31-с №-дээх орто оскуолалар, 4-с маҕаһыын, Үөрэх управлениетын дьиэтэ.

Дыбарыаска үлэ күөстүү оргуйар

Оҕо айымньытын дыбарыаһыгар «Азия оҕолоро» оонньуулары көрсө киэҥ далааһыннаах өрөмүөн үлэтэ ыытыллар. Дьиэ тас моһуона эрэ буолбакка, ис өттө эмиэ тупсарыллар. Дыбарыас пресс-сулууспата иһитиннэрбитинэн, дьиэ илин өттүн кырааскалыыр, өрөмүөннүүр үлэни бэдэрээтчит ИП Чыймыева Ж.К. тэрилтэтэ толорор. Муниципальнай хантараак хайыы үйэ кулун тутар ыйга түһэрсиллибит. Бэдэрээтчит үлэтин бу ый бүтүөр диэри түмүктүүр былааннаах. Баһаары биллэрэр уонна терроризмы сэрэтэр систиэмэни «Чыпчаал» ХЭТ туруоруохтаах. Дыбарыас ис өттүгэр өрөмүөн үлэтин «Страйк» ХЭТ иилээн-саҕалаан ыытар.

Бэлиэтээн эттэххэ, манна Азия дойдуларын кэскиллээх спортсменнара Го оонньууга күрэхтэһиэхтэрэ. 

VIII-с төгүлүн ыытыллар норуоттар икки ардыларынааҕы «Азия оҕолоро» оонньууларга 22 дойду уонна Арассыыйа регионнарыттан 6 хамаанда кыттара күүтүллэр.

Куорат киинигэр — «ниндзялар»

Ыам ыйын 11 күнэ, субуота. Бу күн туох үлэ ыытылла турарын илэ харахпытынан көрөөрү, хаартысканан репортаж оҥороору, Дзержинскэй уулуссатыттан Ленин проспегар тиийэ хаамтыбыт.

Түмүктээн эттэххэ, куорат киинигэр үлэ күөстүү оргуйар – бэдэрээтчиттэр уһун өрөбүллэргэ сынньанар иллэҥнэрэ суох. Тутуу былдьаһыы диэн маны этэн эрдэхтэрэ!