Быһыыны ылыынан модьуйбат буоллулар

Кэнники ыйдарга региоҥҥа коронавирус дьаҥынан ыалдьыы намтаабытын туһунан иһитиннэрэллэр. Саха сирин кылаабынай судаарыстыбыннай санитарнай бырааһа Маргарита Игнатьева коронавируһу утары булгуччулаах вакцинацияны тохтотор туһунан уураахха илии баттаата. 
Саҥа уураах 2021 сыл ыам ыйын 19 күнүнээҕи уураах модьуйууларын көтүрдэ. Ол курдук, быһыыны ылбатах дьону үлэттэн ууратыы аны тохтотуллар. COVID-19 саҕаланыаҕыттан өрөспүүбүлүкэбитигэр барыта 180 тыһыынчаттан тахса коронавирус дьаҥынан ыалдьыы түбэлтэтэ таҕыста. 
Коронавирус дьаҥын муҥутуур үрдүк көрдөрүүлэрэ быйыл кыһын – тохсунньу-олунньу ыйдарга бэлиэтэммитэ. Ити икки ыйга 82 тыһыынчаттан тахса киһи  COVID-19 сутуллубута. Кэнники үс ый устата региоҥҥа ыарыы таһыма биллэрдик намтаабыта бэлиэтэнэр. Ол эрэн, Роспотребнадзор ыарыыттан быһыынан харыстаныы дьоһун суолталааҕын санатар, быһыыны ылан баран, сыл аҥаарынан ревакцинацияны ааһар туһалааҕа бэлиэтэнэр. 
Ыарыы тарҕаныыта кэнники хайдах буоларыттан көрөн санитарнай быраас саҥа уурааҕы таһаарыан сөп. 2022 сыл бэс ыйыгар быһыыны ылбыт дьон ахсаана региоҥҥа 87,7 % тэҥнэстэ. Ревакцинацияны улахан дьон 81 % ааста.