Быһыыны ылааһыҥҥа инники күөҥҥэ – Хаҥалас улууһа

Саха сиригэр быһыы бастакы түһүмэҕин өрөспүүбүлүкэ улахан нэһилиэнньэтин 64,8% ылбыт. Ити хайысханан үчүгэй көрдөрүүлээҕинэн Хаҥалас улууһа ааттанна: аҕыс муниципальнай тэриллиилэргэ олохтоохтор бары быһыыны ылбыттар. Ол туһунан брифиҥҥэ бырабыыталыстыба бэрэссэдээтэлин солбуйааччы Ольга Балабкина иһитиннэрдэ.
Билиҥҥи туругунан санитарнай-эпидемиологическай быһыы-майгы Саха сиригэр уустугунан хаалар. Коронавирус дьаҥынан ыалдьыы саҥа түбэлтэлэрэ кыратык намтаабыт. Ол эрэн Мирнэй, Нерюнгри, Алдан, Хаҥалас, Ленскэй уонна Мэҥэ Хаҥалас оройуоннарыгар сутуллуу элбэх саҥа түбэлтэлэрэ тахсаллар. Ити ааттаммыт улуустарга бииртэн биэскэ диэри түбэлтэлэр биллэллэр. 
Ыарахан туруктаах киһи ахсаана аҕыйаабыт. ИВЛ аппараатыгар 26 киһи сытар, ыарахан туруктаах киһи ахсаана – 116. 
Доруобуйа харыстабылын тэрилтэлэрэ соторутааҕыта эмп саҥа баартыйатын туппуттар уонна өрөспүүбүлүкэ оройуоннарынан (ол иһигэр киин куоракка) тарҕаппыттар. 
Регион территориятыгар вакцинация салҕанар.  Бүгүҥҥү күҥҥэ 465 тыһ. киһи быһыы бастакы түһүмэҕин ааспыт, ол эбэтэр  64,8% . Ити көрдөрүүнэн Арассыыйа үрдүнэн Саха сирэ 15 субъект иһигэр сылдьар. Ольга Балабкина вакцинация хас биирдии нэһилиэнньэлээх пууҥҥа ураты суолталааҕын бэлиэтээтэ. 
«Муниципальнай тэриллиилэр баһылыктарыгар махтаныахха наада, ордук Хаҥалас улууһун баһылыга  Олег Иринеевы чорботуохпун баҕарабын, кини салайар оройуонугар аҕыс муниципальнай тэриллии улахан дьоно бары быһыыны ылбыттар. Ити түмүктэри биэрэр, куттал суох буолуутун мэктиэлиир», — диэтэ Ольга Балабкина уонна вакцинация тэтимэ Алдан, Ленскэй, Нам, Нерюнгри оройуоннарыгар уонна Дьокуускайга үрдээбитин бэлиэтээтэ.  Итини сэргэ, Чурапчы улууһа хаалан иһэрэ этилиннэ.
Ольга Балабкина бэлиэтээбитинэн, ураты болҕомтоҕо 60-тан үөһэ саастаах дьон сылдьаллар, кинилэр ортолоругар 90 тыһ. киһи быһыыны ылбыт. Кинилэри харыстыыр курдук чугас дьонноро эмиэ быһыыны ылыахтаахтарын туһунан кини санатта.