Булгуччулаах харантыын көтүрүлүннэ

2022 сыл олунньу 6 күнүттэн коронавируснай инфекцияттан ыарыһахтары эмтээһин 7 күҥҥэ диэри кылгатыллан биэрдэ.
Саха сирин Доруобуйаҕа харыстабылын министиэристибэтэ санатарынан, олунньу 6 күнүттэн саҥа коронавируснай инфекция профилактикатыгар санитарнай быраабылалар саҥардылыннылар. Ол курдук, COVID-19 ыалдьыбыт дьону кытта бииргэ олорор, кинилэри кытта алтыспыт дьон булгуччулаах харантыыҥҥа олоруулара уурайда. Бу уларытыы “омикрон” штамынан ыалдьыы чэпчэкитик ааһарын кытта сибээстэннэ.
Маны таһынан 2022 сыл олунньу 6 күнүттэн хоруоналаах дьаҥынан ыалдьыбыт дьону эмтээһин 7 күҥҥэ диэри кылгаан биэрдэ, маныаха ыарыһах бүллүтүөнүн лииһин поликлиникаҕа сылдьыбакка уонна ПЦР-тест туттарбакка эрэ дьиэтигэр олорон арыйтарыан уонна саптарыан сөп. 
Санатар буоллахха, ОРВИ эбэтэр COVID-19 ыалдьыбыт сибикитин биллэххитинэ, Биир кэлим колл-киин нүөмэригэр – “122” эбэтэр олорор сиргитинэн поликлиника колл-киинигэр биллэриҥ.