Бу ыйга өрөспүүбүлүкэ үрдүнэн уонтан тахса уулусса-суол эбийиэгэ үлэҕэ киириэҕэ

Өрөспүүбүлүкэ баһылыгын уонна бырабыыталыстыбатын пресс-сулууспата иһитиннэрбитинэн, балаҕын ыйыгар өрөспүүбүлүкэ үрдүнэн уонтан тахса уулусса-суол эбийиэгэ үлэҕэ киириэҕэ. Өрөмүөн үлэтэ дойду бэрэсидьиэнэ Владимир Путин көҕүлээбит «Куттала суох, хаачыстыбалаах суоллар» национальнай бырайыагын чэрчитинэн ыытыллар.

Дьокуускайга, Куорат күнүн көрсө, Покровскайдыыр тракт 8-с килэмиэтиригэр оҕо тубркулезнай санаторийыгар чугаһыыр суол өрөмүөнэ түмүктэннэ. Сотору кэминэн өссө биир социальнай эбийиэккэ – Хаан кутар станцияҕа чугаһыыр суол үлэҕэ киириэҕэ.

Итини таһынан, киин куоракка бу ыйга өрөмүөн кэнниттэн Островскай, Челюскин, Кузьмин, Аржаков, Поярков уулуссалара аһыллыахтара. Итиэннэ кэккэ эбийиэктэри куорат кытыытыгар үлэҕэ киллэриэхтэрэ. Ол курдук, Тулагыга балаҕан ыйын бүтүүтэ Первомайскай, Совхознай уонна Строительнай уулуссалар, оттон Табаҕаҕа – Центральнай уулусса өрөмүөннэрэ түмүктэниэҕэ.

Улахан үлэ регионнааҕы трассаларга ыытыллар. Ол курдук, бу күннэргэ Дьокуускайы Хаҥалас улууһун кытта ситимниир «Умнас» суол 28-с км 35-с км диэри учаастак үлэҕэ киирдэ.

Өрөмүөннэнэр суоллар хаалбыт учаастактара алтынньы ыйга үлэлэрэ бүтүөҕэ, холобур, Ленин проспегын уларытан оҥоруу иккис түһүмэҕэ түмүктэниэҕэ.