Бу ыарыыны бары умнуохтаахпыт

Вакцинаны туруоруу эрдэттэн суруйтарыыта суох 3 №-дээх Дьокуускайдааҕы куорат балыыһатыгар ыытылынна.

Ааспыт өрөбүллэргэ 557 киһи бу балыыһаҕа босхо вакцина ыллылар диэн медицинскэй тэрилтэ пресс-сулууспата кэпсиир.

“Аахсыйа куорат олохтоохторо вакцина ыларга улахан интэриэстээхтэрин көрдөрдө. Баҕалаах киһиэхэ барыларыгар туруордубут, биһиги балыыһабытыгар сыһыарыллыбатах да дьоҥҥо. Биһиги кэлэктиибинэн иммунитет хайа кыалларынан түргэнник үөскүүрүгэр уонна бу COVID-19 ыарыыны бары умнарбытыгар сүрүн интэриэстээхпит”, – диэтэ балыыһа кылаабынай бырааһа Светлана Давыдова.

Балыыһа салайааччыта дьон вакцина ылар кыахтара  бэйэлэрин эрэ поликлиникаларыгар буолуо суохтаах диэн бэлиэтээтэ. Кини эппитинэн, маннык быраактыка өссө салҕаныа.

Билигин дьоҥҥо “Спутник V» («Гам-КОВИД-Вак”) Арассыыйа вакцинатын туруораллар. Хас биирдии түһүмэх аайы быраас булгуччу көрүүтэ ирдэниллэр. Вакцина ыла кэлэргэ пааспары, ОМС полиһын уонна СНИЛС илдьэ кэлэргит булгуччулаах.