Бу нэдиэлэнэн дьиэлэртэн сылааһы араарары былаанныыллар

ОДьКХ министиэристибэтин пресс-сулууспата иһитиннэрэринэн, Дьокуускайга таас дьиэлэргэ уонна тэрилтэлэргэ – бу нэдиэлэнэн, ыам ыйын 23 чыыһылатынан, мас дьиэлэргэ бэс ыйын 1 күнүн диэки  сылааһы араарары былаанныыллар.
Санатар буоллахха, оттук сезона таһырдьа 5 күн субуруччу +8 кыраадыстан итэҕэһэ суох сылаас буоллаҕына түмүктэнэр. 
Өрөспүүбүлүкэ улуустарыгар оттук сезона ыам ыйын 21 күнүнэн – Чурапчы оройуонугар, ыам ыйын 22 күнүнэн Амма, Уус Алдан, Таатта, Мэҥэ Хаҥалас улуустарыгар түмүктэнэрэ былааннанар. 
Дьокуускай куораты кытта ыам ыйын 23 күнүнэн – Томпо, ыам ыйын 25 күнүнэн – Ньурба, Сунтаар, ыам ыйын 26 күнүнэн – Бүлүү, Горнай, Томмот, ыам ыйын 27 күнүнэн Үөһээ Бүлүү, Кэбээйи оройуоннарыгар ититии араарыллыаҕа.
Хоту улуустартан оттук сезона саамай хойутуу, бэс ыйын 18-19 күннэригэр Усуйаанаҕа уонна бэс ыйын 23 күнүгэр Аллайыахаҕа түмүктэниэҕэ.
Халаан уутуттан эмсэҕэлээбит оройуоннарга оттук сезона уһатыллара сабаҕаланар. Ол туһунан быһаарыыны олохтоох бэйэни салайыныы уоргана өҥөнөн хааччыйааччы тэрилтэни кытта ылынар.