Бриллиант баалга киирбит үп оҕо пуондатыгар бэриллэр

Тэрийээччилэр этэллэринэн, «Бриллиант баал» өрөспүүбүлүкэ норуоттарын ювелирнай оҥоһуктарын нөҥүө регион сирин баайын көрдөрөр сыаллаах. Урукку өттүгэр тэрээһин күһүн ыытыллара, быйыл бастакы төгүлүн «Кыһын Саха сириттэн саҕаланар» өрөспүүбүлүкэтээҕи бэстибээл чэрчитинэн тэрилиннэ.

«Бриллиант баал – ураты тэрээһин. Быйыл «Кыһын Саха сириттэн саҕаланар» өрөспүүбүлүкэтээҕи бэстибээл чэрчитинэн ыытылынна. Бэстибээл доҕотторбутун, Саха сирин таптыыр дьону, биһиги эриэккэс региоммут олохтоохторун түмэр. Бриллиант баал, бэстибээл сорҕото буолан, Саха сирин туризмын брендын – алмаастары киэҥ эйгэҕэ таһаарарга туһуланар», – диэтэ бырабыыталыстыба бэрэссэдээтэлэ Кирилл Бычков.

Бырабыыталыстыба бэрэссэдээтэлэ регион култууратын уонна креативнай индустриятын тарҕатыыга кылааттарын иһин «Күн киһитэ» норуот бириэмийэтин Максим уонна Евгения Арбугаевтарга туттарда.

Итини таһынан, бу күн судаарыстыбаннай циркаҕа биллиилээх модельер, худуоһунньук уонна таҥас дизайнера Августина Филиппова «Дьол тааһа» ювелирнай брендин сүрэхтэниитэ, итиэннэ өрөспүүбүлүкэ  ювелирнай оҥоһуктарын, «Саха сирин амтана» гастрономия тыйаатырын билиһиннэрии буолла.