Бойобуой дьайыылар бэтэрээннэрин күнүн бэлиэтээтилэр

Биһиги биир дойдулаахтарбыт Ийэ дойду иннигэр ытык иэстэрин көмүскээн араас сылларга Афганистан, Хотугу Кавказ, Нагорнай Карабах сэриилэригэр кыттыбыттара, Латинскай Америка, Африка, Азия уонна Сирия кыһалҕаларыттан туора турбатахтара.

Саха сирин буойуннара бүгүн Арассыыйа Сэбилэниилээх күүстэрин кэккэтигэр анал байыаннай дьайыыга кытталлар. Ол туһунан Былатыан Ойуунускай аатынан Саха тыйаатырыгар буолан ааспыт Бойобуой дьайыылар бэтэрээннэрин күнүгэр аналлаах тэрээһиҥҥэ Ил Дархан уонна СӨ Бырабыыталыстыбатын дьаһалтатын салайааччыта Георгий Михайлов иһитиннэрдэ.

Кини бэйэтин этиитигэр бүгүн биһиги кэккэбитигэр суох, биһиги үрдүбүтүгэр эйэлээх халлаан турарын туһугар олохторун толук уурбуттар сырдык ааттарыгар сүгүрүйэр иэстээхпитин санатта.

Бу күн анал байыаннай дьайыыга олохторун толук уурбут рядовой Иван Андреевка, младшай сержант Евгений Дитятьевка, сержант Савва Михайловка уонна рядовой Даниил Соколовка анаммыт Эр санаа уордьанын ийэлэригэр уонна кэргэттэригэр туттардылар, биир мүнүүтэлээх иһийэн туруунан чиэстээтилэр.

Мустубут дьоҥҥо Арассыыйа Бэрэсидьиэнигэр Саха Өрөспүүбүлүкэтин бастайааннай бэрэстэбиитэлэ, СӨ координационнай киинин салайааччыта Андрей Федотов, ыччат дьыалатыгар уонна социальнай коммуникацияларга миниистир Петр Шамаев, иеромонах Гермоген, бойобуой дьайыылар бэтэрээннэрэ уонна уопсастыбаннай тэрилтэлэр салайааччылара тыл эттилэр.

Тыйаатыр фойетыгар Аҕа дойду Улуу сэриитин кэминээҕи сэп-сэбиргэл быыстапката, хаартыскалар туруорулуннулар. Тэрээһин бырааһынньыктааҕы кэнсиэринэн түмүктэннэ, диэн иһитиннэрэр Ил Дархан уонна Бырабыыталыстыба пресс-сулууспата.