БКЭ сүрүн болдьоҕо саҕаланна

Быйыл киин куорат 18 оскуолатыгар эксээмэн ыытыллар пууннара тэрилиннэ.    

Үөрэх управлениетын начаалынньыгын солбуйааччы Мирослав Афанасьев иһитиннэрбитинэн, ыам ыйын 31 күнүгэр оҕолор географияны, литератураны уонна химияны туттардылар, сэттэ пуун үлэлээтэ.

Куорат оскуолаларыгар эксээмэн бары санитарнай миэрэни тутуһан ыытыллар. Кыттааччы элбэх түгэнигэр, оҕолор тус-туспа аанынан киирэллэр-тахсаллар. Үөрэнээччилэр балтараа миэтэрэ тэйиччи олороллор. Биир  кабинекка 8-10 киһи киирэр (кылаас төһө киэҥиттэн эбэтэр кыараҕаһыттан тутулуктаах).     

Үөрэх управлениетын начаалынньыгын солбуйааччы кэпсээбитинэн, хас биирдии пууҥҥа кыттааччылар температураларын кээмэйдииллэр, салгыны ыраастыыр рециркулятордар уонна антисептиктаах дозатордар тураллар.  Эксээмэн бүппүтүн кэннэ кабинеттары дезинфекциялыыллар.   

«Быйылгы ураты – БКЭ-ни үрдүк үөрэх кыһаларыгар киирэр выпускниктар эрэ туттараллар. Үрдүк үөрэх кыһатыгар барбат оҕолор судаарыстыбаннай выпускной эксээмэн (ГВЭ) туттараллар», – диэтэ Мирослав Афанасьев.