БКЭ бастакы сүүс бааллаахтарын ааттара билиннэ

БКЭ түмүгүнэн химияҕа уонна литератураҕа бастакы сүүс бааллаах биэс оҕо аата билиннэ.  Бу туһунан Олохтоох дьаһалта пресс-сулууспата иһитиннэрдэ.  

Литератураҕа муҥутуур үрдүк баалы Дьокуускай куорат 7-с нүөмэрдээх оскуолатыттан Софья Бондаренко, 26-с нүөмэрдээх оскуолаттан Алина Капустина уонна куораттааҕы классическай гимназияттан Маргарита Шмыгина ыллылар.

Химияҕа 100 баалы Дьокуускай куораттааҕы лицейтэн Дина Малогулова уонна  Н.А. Алексеева аатынан техническэй лицейтэн Назар Павлов ыллылар.

Бүгүҥҥү күннээҕи туругунан географияҕа, литератураҕа, химияҕа, нуучча тылыгар, математикаҕа, историяҕа, физикаҕа уонна обществознаниеҕа эксээмэннэр буолан аастылар.

Бэс ыйын 14, 16, 17 күннэригэр оскуоланы бүтэрээччилэр омук тылыгар уонна биологияҕа, бэс ыйын 20 уонна 21 күннэригэр – информатикаҕа уонна информационнай-коммуникационнай технологияҕа (ИКТ) туттарыахтара, ол кэнниттэн, бэс ыйын 23 күнүттэн от ыйын 2 күнүгэр диэри, БКЭ туттарар «резервнэй» күннэр буолуохтара.

Дьокуускайга быйыл БКЭ 3 тыһыынча кэриҥэ киһи туттарар.