Бизнес-инкубатор кэккэтэ кэҥиир

«Мин бизнеһим» киин бизнес-инкубаторыгар 6 предприниматель киирдэ. Кинилэр үлэлээн эрэр эйгэлэрэ – туризм, тас таҥас тигиитэ, полиграфия, дьиэ тэрилин оҥоруу уо.д.а. нэһилиэнньэҕэ туһалаах өҥөлөр.

«Мин бизнеһим» Киин бизнес-инкубаторыгар хос куортамныыр күрэххэ кыайбыккытынан эҕэрдэлиибин. Резидент буолбут күҥҥүтүттэн эһиги чэпчэтиилээх куортамынан эрэ туһаммакка, өссө бэлэм тэриллээх уонна бырайыаккыт сайдарыгар өйөбүллээх буолаҕыт. Саҥа саҕалаан эрэр дьыалаҕытыгар ситиһиилэри баҕарабын», — диэн «Мин бизнеһим» киин салаатын начаалынньыга Татьяна Стручкова резиденнэргэ туһаайан эҕэрдэ тылыгар эттэ.

Үөһэ этиллибитин курдук, резиденнэр бырайыактара сайдарыгар, хорсуннук инники хардыылары оҥороллоругар «Мин бизнеһим» киин бары кыаҕы биэрэр. Ол курдук, эдэр предпринимателлэр туох баар наадалаах тэрилинэн хааччыллыбыт хосторго үлэлиэхтэрэ, ону таһынан экспертнэй, информационнай өйөбүлү ылыахтара, бизнеһи былаанныырга сүбэ уонна үөрэх өҥөлөрүнэн туһаныахтара. Итини таһынан бизнес эйгэтигэр саҥа хардыылаан эрэр дьоҥҥо юрист уонна бухгалтер өйөбүллэрэ төһүү күүс буолуохтара.

Бүгүҥҥү күннээҕи туругунан «Мин бизнеһим» киин бизнес-инкубатор дистанционнай резиденэ буолуон баҕалаах дьонтон күрэххэ кыттарга докумуоннары хомуйууну салгыыр. Ол туһунан сиһилии дьоҕус уонна орто предпринимательство порталыгар билсиэххэ сөп: Portal.b14.ru.

Босхо суһал линия нүөмэрэ 8-800-100-58-80

WhatsАpp нүөмэрэ 8-924-873-00-97