«Бириэмэ ирдэбилэ” форум ыытыллаары турар

Форумҥа Уһук Илин инбэлииттэрин уопсастыбатын бэрэстэбиитэллэрэ, дьарыктаах буолуу кииннэрин исписэлиистэрэ уонна доруобуйаларынан хааччахтаах дьон кыттыыны ылыахтара. Форум чэрчитинэн быыстапка, үлэ дьаарбаҥката, кэпсэтиилэр, төгүрүк остуоллар ыытыллыахтара.

Даҕатан эттэххэ, бүгүн өрөспүүбүлүкэҕэ 58000 тахса инбэлиит олорор. Олортон 35000 киһи үлэлиир саастарыгар сылдьаллар, 28000-ҕа тиийэ киһи араас тэрилтэлэргэ үлэлииллэр. 18-тан 44-гэр диэри саастаах 18000 кэриҥэ доруобуйаларынан хааччахтаах дьон баара биллэр.

Биллэн турар, хас биирдии киһиэхэ үлэлээх буолуу – тыын боппуруос. Оттон доруобуйатынан хааччахтаах киһиэхэ ол икки бүк суолталаах. Үлэлээх киһи олоххо сыаллаах, сарсыҥҥыга эрэллээх. Киһи – санаатынан. Онон үлэ булуохтарыттан доруобуйалара тупсубут, бэл, учуоттан тахсыбыт киһи элбэх.