Билиҥҥи туругунан ойуур баһаардара суохтар

«Бүтэһик күннэргэ халлаан туруга биһиэхэ олус көмөлөстө. Ол эрэн, дьон үлэтин сыаналаабат буолар сатаммат, наһаа элбэх баһаар ыркый ойуурдаах тайҕаҕа, олус уустук усулуобуйаҕа умуруорулунна. Бастатан туран, парашютистарга уонна десантниктарга, сиргэ сылдьан ойуур баһаарын умуруорааччыларга, быыһааччыларга, лүөччүктэргэ, диспетчердэргэ, суоппардарга уонна бары үлэлэспиттэргэ улахан махталбын тиэрдиэхпин баҕарабын», - диэтэ Дмитрий Садовников.

Кини генерал-майор Павел Гарин салайааччылаах Арассыыйа ЫБММ Кылаабынай управлениетын сотрудниктарыгар, Евгений Перфильев салайааччылаах Экология министиэристибэтигэр, Дмитрий Лепчиков бэрэссэдээтэллээх Госкомобеспечениеҕэ, кинилэр биэдэмистибэлээх тэрилтэлэригэр, итиэннэ  метеорологтарга уонна ЯУГМС начаалынньыгын солбуйааччыта Татьяна Маршаликка махтанна.

«Сылтан сыл баһаары кытта охсуһарбытыгар көмөлөһөр РФ Айылҕа ресурсаларыгар уонна экологияҕа миниистиригэр Александр Козловка, Рослесхоз салайааччыларыгар Иван Советниковка, Алексей Венглинскайга уонна да атын федеральнай кэллиэгэлэрбитигэр истиҥник махтанабыт. Структуралар бииргэ алтыһыыларын сүрүннээбит секретариатым сотрудниктарын үлэлэрин, чуолаан «көстүбэт фронт байыаһын» Айал Гоголевы бэлиэтиэхпин баҕарабын», - диэн бэлиэтээтэ вице-премьер.

Регионнааҕы Экология министиэристибэтин дааннайдарынан, ааспыт сууккаларга ойуур баһаара баара биллибэтэ. Балаҕан ыйын 11 күнүгэр авиация Ан-2 үс борта патруллаата.

Санатар буоллахха, 2023 сыл балаҕан ыйын 6 күнүгэр ойуур баһаардарынан сибээстээх регионнааҕы ыксаллаах быһыы-майгы эрэсиимэ көтүрүллүбүтэ.