Биир мөлүйүөҥҥэ чугаһаан эрэбит

Саха сирэ Уһук Илиҥҥи федеральнай уокурук үрдүнэн нэһилиэнньэтин ахсаана эбиллиитинэн инники кэккэҕэ сылдьар. Ыам ыйын 30 күнүгэр  «Российская газета» былырыыҥҥы Бүтүн Арасыыйатааҕы нэһилиэнньэ биэрэпиһин барыллаан түмүктэрин таһаарда.
Саха сирэ нэһилиэнньэтин ахсаана эбиллиитинэн Уһук Илиҥҥи федеральнай уокурукка  саамай үрдүк көрдөрүүлээх.  Нэһилиэнньэ ахсаанын үрдээһинэ федеральнай уокурук икки субъегар бэлиэтэнэр: Саха сиригэр  — 3,9% уонна Бурятияҕа — 0,7%. Итиннэ олоҕуран көрдөххө, региоммут олохтооҕун ахсаана биир мөлүйүөҥҥэ чугаһаата. Ол курдук, 2021 сыл алтынньы 1 күнүнээҕи туругунан, өрөспүүбүлүкэҕэ нэһилиэнньэ биэрэпиһигэр 996 тыһыынча киһи хабылынна. Саха сирин олохтоохторун ахсаана, 2010 сыллааҕыны кытта тэҥнээтэххэ, 38,8 тыһыынча киһинэн эбилиннэ. 
Арассыыйа бүттүүнүн ылан көрдөххө, куораттарга көһүү бырыһыана улахан: нэһилиэнньэ 75% куоракка, 25% — тыа сирин нэһилиэнньэлээх пууннарыгар олорор. Биһиги региоммутугар эмиэ итинник хартыына көстөр: 665 тыһыынча киһи (66,8%) — куорат олохтоохторо, 331 тыһыынча киһи (33,2%) тыа сиригэр олорор. Бэчээккэ тахсыбыт статистика дааннайдара – барыллаан көрдөрүү. Түмүк сыл бүтэһигэр биллиэхтээх.