Биир кэлим босуобуйа сайабылыанньатын хомуйуу саҕаланна

Санатар буоллахха,  2023 сыл тохсунньу 1 күнүттэн, дойду үрдүнэн биир кэлим универсальнай босуобуйа киллэрилиннэ. Кини урут баар (ийэ оҕо күүтэр кэмиттэн оҕото 17 сааһын туолуор диэри) оҕолоох дьиэ кэргэттэри өйүүр миэрэлэри  холбоото. Универсальнай босуобуйа операторынан Социальнай страхование уонна Биэнсийэ пуондаларын холбоон оҥоһуллубут Арассыыйа Социальнай пуондата буолла.

Итини сэргэ Судаарыстыбаннай уонна муниципальнай өҥө Биир кэлим порталын нөҥүө электроннай көрүҥүнэн туһаныахха сөп https://www.gosuslugi.ru.

«Босуобуйа хас даҕаны өйөбүл миэрэтин холбуур: эрдэтээҥи болдьоххо учуокка турбут хат дьахталлар төлөбүрдэрин, 17 сааһын туола илик оҕолор ыйын аайы ылар уонна бастакы, үһүс уонна ол кэннинээҕи 3 сааһын туола илик оҕолор төлөбүрдэрин, 3-7, 8-17, 0-16  саастаах оҕолорго өйөбүл эбии миэрэлэрин – ыйдааҕы төлөбүрдэрин. Ити курдук, биир кэлим босуобуйанан өйөбүлгэ наадыйар дьиэ кэргэттэр бары туһаныахтарын сөп», – диэн быһаараллар өрөспүүбүлүкэтээҕи Үлэ уонна социальнай сайдыы министиэристибэтигэр.

Хас биирдии сайабылыанньанан дьиэ кэргэн өйөбүлгэ наадыйарын биир кэлим сыанабыла оҥоһуллар. Төлөбүр кээмэйэ ыал дохуотуттан тутулуктаах, муҥутаан тиийинэн олоруу 50%, 75%, 100% тэҥнэһэр.

2022 сыл ахсынньы 31 күнүгэр диэри төрөөбүт оҕолоох ыал быйыл биир кэлим босуобуйанан туһанары, эбэтэр урут анаммыт төлөбүрү ыла сылдьары бэйэлэрэ быһаараллар.

Сайабылыанньаны тутан баран, Арассыыйа Социальнай пуондата биэдэмистибэлэр икки ардыларынааҕы бииргэ үлэлээһин чэрчитинэн, ирдэнэр докумуоннары туһааннаах уорганнартан бэйэтэ хомуйар.