Биэс Олимпийскай путевка баар!

Стамбулга түмүктэммит олимпийскай лицензиялардаах аан дойдутааҕы турнирга саха тустууга оскуолатын бөҕөстөрө Виктор Рассадин 74 кг (Таджикистан) уонна Айаал Лазарев 125 кг (Кыргызстан) “Олимпиада-2024” кыттар путевкалары ылаттаатылар.

Олимпийскай путевкалары бу иннинэ саха тустууктара Арыйаан Тютрин 57 кг (Белоруссия), Георгий Окороков 65 кг (Австралия)  ылаттаабыттара.
42 км марафоҥҥа Азия чемпионатын боруонса призера Сардаана Трофимова Парижка буолар Олимпийскай оонньууларга кыттар буолбутун туһунан үөрүүлээх сонуну Кыргызстан чэпчэки атлетикаҕа федерациятын бэрэсидьиэнэ Канат Аманкулов ыам ыйын 11 күнүгэр Саха Өрөспүүбүлүкэтин сүүмэрдэммит хамаандатын киинин дириэктэрэ Михаил Пахомовка иһитиннэрэн турар. Узбекистан марафонката Ситора Хамидова допиҥҥа түбэспитинэн дисквалификацияламмытынан, 2023 с. сэтинньи 11 күнүгэр Арабтар Холбоһуктаах Эмираттарын киин куоратыгар Дубайга буолан ааспыт Азия чемпионатыгар ылбыт үрүҥ көмүс мэтээлэ Сардаана Трофимоваҕа туттарыллыбыт. Эрдэ иһитиннэрбиппит курдук, Азия чемпионатыгар Кыргызстан хамаандата бастакы миэстэни ылбыта. 
Онон «Олимпиада-2024» Саха сириттэн 5 спортсмен кыттыыны ылар буолла. Бу – өтөрүнэн буолбатах үрдүк чыпчаал! Спортсменнарбытыгар кыайыы өрөгөйүн баҕарабыт!