Биэнсийэҕитин дьиэҕитигэр аҕалтарыҥ
Арассыыйа пенсионнай пуондатын Саха сиринээҕи салаата кирэдьиитинэй тэрилтэ нөҥүө биэнсийэлэрин ылар кырдьаҕас дьоҥҥо муус устар 12 күнүгэр диэри биэнсийэни эрдэ төлүүр буолла диэн Үлэ уонна социальнай харалта министиэристибэтин пресс-сулууспата иһитиннэрэр.
Сбербанк уонна Россельхозбанк көрүллүөхтээх үбү аһардыбыттар. Оттон “Почта России” ПАУо көмөтүнэн тиэрдиллэр биэнсийэ харчыта муус устар 5 күнүттэн олохтоммут бэрээдэгинэн төлөнүөҕэ.
Дьокуускай уонна хоту сытар улуустар биэнсийэлэрин уруккуларынааҕар эрдэ ылыахтара. Маны таһынан, муус устар ыйга Саха сирин 4939 сэрии уонна тыыл бэтэрээннэрэ Улуу Кыайыы 75 сылыгар, РФ бэрэсидьиэнин укааһынан олохтоммут, 50 уонна 75 тыһ. солк. харчыларын тутуохтара.
Дьокуускай, Жатай, Нерюнгри уонна Мииринэй оройуоннарын олохтоохторо, дьиэҕэ олоруу эрэһиимэ буола турарынан сибээстээн, биэнсийэ ыла диэн ханна да кэлэр-барар наадата суох! Пластиковай картанан туһаныаххытын сөп. Почтаттан биэнсийэ ылар дьоҥҥо почтальон бэйэтэ дьиэҕитигэр аҕалан биэриэҕэ. “Почта России” муус устар 1 күнүттэн саҕалаан биэнсийэни тарҕатан саҕалаата, ылбакка хаалбыт дьон 8-800-1-000-000 эрийэн билсиэххитин сөп.
Социальнай биэнсийэ бу ый 20 чыыһылатыгар диэри төлөнүөҕэ.
Дьокуускай олохтоохторо биэнсийэ боппуруоһугар билсэр нүөмэргит: 444-680.
Биэнсийэ түҥэтээччилэр ыарыы тарҕаммыт кэмигэр туттуу-хаптыы быраабылаларын билэллэр, маасканан харыстаналлар. Почта үлэһиттэрэ илии тутуһуута суох харчы түҥэтэр ньымалары баһылыыллар.
“Алмазэргиэнбанк” кырдьаҕастарга карточка оҥорон аҕалан биэрэр өҥөнү оҥорор . Биэнсийэ ылар картаны оҥотторуу сайаапкатын www.albank.ru сайтка эбэтэр 88001003422 төлөпүөҥҥэ эрийэн түһэрэҕит. «АЭБ Онлайн 2.0» сыһыарыы көмөтүнэн коммунальнай өҥөлөрү төлүөххэ, харчыны дьоҥҥо ыытыахха сөп.
«Сбербанк Онлайн» сыһыарыы туһатын үгүспүт билэр буолуохтаах. Бу күннэргэ Сбербанк офистара кылгатыллыбыт эрэһиимҥэ көстүлэр. Ханнык офистар хайдах үлэлииллэрин www.sberbank.ru сайтка көрүҥ.
“Россельхозбанк” эмиэ мобильнай сыһыарыылаах. Төлөпүөннэрэ: 800 100-0-100 (Арассыыйа иһинэн босхо). Дьокуускайга Пушкин уул. 12 баар офиска кассалар үлэлииллэр.
Сонуннар
Ордук ааҕаллар
