Биһиги пенсионердарбыт мэлдьи инники күөҥҥэ

Дьокуускайдааҕы Үһүс көлүөнэ оскуолатын курсистара, волонтёр-педагогтара Саха сиригэр ыытыллар норуот маастарын Күнүн чэрчитинэн бэйэлэрин оҥоһуктарын быыстапкалаан көрдөрдүлэр.

Быыстапка Үһүс көлүөнэ оскуолатын директора П.Ю.Прядезникова көҕүлээһининэн тэрилиннэ. 203-с микрорайоҥҥа "Смарт" библиотека киэҥ-куоҥ актовай саалатыгар турбут быыстапка дьон-сэргэ болҕомтотун тарта. Аҕа саастаах куорат олохтоохторо сөҕүмэр үчүгэй оҥоһуктары, үлэлэри көрдөрдүлэр. Иһирэх ийэлэр, эйэҕэс эбээлэр күннээҕи түбүктэриттэн ордон, кэрэни кэрэхсээн, бириэмэлэрин олус туһалаахтык атаараллар.

Харах халтарыйар эҥин-эгэлгэ оҥоһуктарын манна көрдүбүт: баайыы таҥастар (салайааччы Р.В. Ощепкова); оҕуруоттан араас дьэрэкээн кольелар, брошьтар (Н.Ф. Артамонова); иис араас көрүҥэ; шерсть саптан хатайдаан оҥоруу - валяние (А.Н. Петрова); маслянай кыраасканан, акварелынан уруһуйдар; тигии куукулалар, оонньуурдар (К.И. Иванова); ону тэҥэ араас паннолар, лентанан вышивка уо. д. а.

Ытык пенсионердарбыт ким дьиэтигэр олорон, ким zoom платформаҕа дьарыктанан, бэйэлэрин сатабылларын дьон-сэргэ көрүүтүгэр таһаарбыттара хайҕаллаах, үөрүүлээх суол. Кинилэри көрөн киһи үтүктүөн, үөрэниэн баҕарар.

Үһүс көлүөнэ оскуолатын оҥоһуктарын быыстапкатын аны сайын Туймаада Ыһыаҕар өссө көрдөрөллөрө буоллар диэн эрэнэ хаалыаҕыҥ.

        Софья Прокопьева

        Дьокуускай.