"Биһиги куораппыт - биһиги идиэйэлэрбит" бырайыакка кыттыһыҥ!

Дьону-сэргэни кытта көрсүһүүлэргэ баар кыһалҕалары быһаарыыга, куораты сайыннарыыга анаммыт элбэх этии киирэр. Онтон сиэттэрэн, олунньу 10 күнүгэр тапталлаах куораппыт кэскилин кэҥэтэр, саргытын салайар санааларбытын түмэр соруктаах “Биһиги куораппыт – биһиги идиэйэлэрбит” диэн ыҥырыы таһаарбытым. Ол чэрчитинэн сквердэри, тиэргэннэри тупсарыыттан, светофордар үлэлэриттэн, оптуобустар сылдьар схемаларыттан саҕалаан, куоракка энергетика, тутуу, ОДьКХ о.д.а. тутаах салаалары сайыннарыыга тиийэ ыллыктаах этиилэргитин күүтэбит.

Дьокуускайбыт – биһиэхэ барыбытыгар алаһа дьиэбит кэриэтэ, онон биир сомоҕо санаанан салайтардахпытына эрэ, киин куораппытын тупсарар, сайыннарар кыахтаахпыт. Ордук наадалаах уонна интэриэһинэй идиэйэлэри тус бэйэм өйүөм уонна ону олоххо киллэрэри туруулаһыам.

Аҕыйах күн иһигэр бассаап нүөмэргэ уонна электроннай почтаҕа 100-тэн тахса араас этии киирдэ. Ол иһигэр 202-с микрооройуоҥҥа норуокка «Бригантина» диэн аатынан биллибит дьиэ таһыгар сквер тутуутун туһунан бэртээхэй идиэйэ баар.  Итини тэҥэ дьон-сэргэ уопсай субуотунньуктары ыытыахха диэн туруорсаллар.

Куорат олохтооҕо Василий Зырянов Дьокуускайтан Төхтүр турбазатыгар тиийэ оптуобустар сырыыларын олохтуур туһунан этиитин сэргээтибит.

Ааспыт өрөбүллэргэ онно дьиэ кэргэммин кытта биир үтүө күнү атаардыбыт уонна бу хайысханан сырыы булгуччу наадатын итэҕэйдим. “ЯПАК” тэрилтэ тырааныспар министиэристибэтин кытта маршрут оҥороллоругар уонна өрөбүллэргэ оптуобустар сырыыларын тэрийэллэригэр сорудахтаатым.

Оптуобустар расписаниеларын, хантан баралларын туһунан эбии биллэриэхпит. Инстаграмҥа сторис таһаарыам эбэтэр пресс-сулууспа иһитиннэриэ.  

Эһиги сонун, саҥа көрүүлэри, көдьүүстээх этиилэри көхтөөхтүк киллэриэххит диэн эрэнэбин. Хас биирдии интэриэһинэй идиэйэни дьаһалта мунньахтарыгар ырытыахпыт, дьүүллэһиэхпит.

Киин куорат ытык-мааны олохтоохторо! Бэйэҕит идиэйэлэргитин, сонун санааларгытын хас да ньыманан ыытыаххытын сөп:

- ideigorodu@mail.ru электроннай почтаҕа;

- +79244624478 WhatsApp нүөмэргэ.

Этиилэргитин хаартыскалыаххытын, ойуулуоххутун уонна ол туһунан презентация оҥоруоххутун сөп. Суруккутугар толору ааккытын-суолгутун уонна төлөпүөҥҥүтүн, электроннай почтаҕытын ыйаргытын умнумаҥ.

Дьокуускай куорат баһылыгын эбээһинэһин толорооччу

Евгений Григорьев