18.07.2019 | 11:39

БЭЙЭҔЭ ҮЛЭЛИИР БАРЫҺЫН ДАКААСТААБЫТ КЫЫС

БЭЙЭҔЭ ҮЛЭЛИИР БАРЫҺЫН ДАКААСТААБЫТ КЫЫС
Ааптар: Киин Куорат

Бэйэҕэ үлэлиир ордук кэрэхсэбиллээҕин, барыстааҕын дакаастаабыт Светлана Семенова бүгүн «Киин куорат» ааҕааччыларыгар бэйэ дьыалатын арыйыы, бэйэ суолун тобулуу кистэлэҥнэрин арыйар.

Кэлиҥҥи кэмҥэ бэйэ дьыалатын тэриниигэ судаарыстыба, өрөспүүбүлүкэ да өттүттэн балайда болҕомто ууруллар. Тоҕо диэтэххэ аныгы ырыынак үйэтигэр  хас биирдии киһи олоҕун уйгута тус бэйэтиттэн эмиэ тутулуктаах. Киһи төһөнөн тобуллаҕас толкуйдаах, үлэһит, кыһамньылаах да, соччонон олоххо элбэх ситиһиилээх буолар үйэтэ кэллэ.

Бүгүҥҥү ыалдьыппыт – бизнес-инкубатортан кынаттаммыт эдэр урбаанньыт, «Сахатехконсалт» диэн тэрилтэ хаһаайката Светлана Семенова. Кини хампаанньата «биир кэлим түннүк» ньыматынан үлэҕэ уонна тулалыыр эйгэҕэ сэрэхтээх буолууну уонна промышленнай куттал суох буолуутун боппуруостарыгар үлэлиир. Ону таһынан, көҥүл ылар докумуоннары толоруунан, үлэһиттэри эбии үөрэттэриинэн дьарыктанар. Билиҥҥи туругунан 200-тэн тахса техничэскэй идэлээх дьон үөрэнэн тахсыбыт. Светлана бүгүн «Киин куорат» ааҕааччыларыгар бэйэ дьыалатын арыйыы, бэйэ суолун тобулуу кистэлэҥнэрин арыйыаҕа.

УРБААН ЭЙГЭТИГЭР ҮКТЭЛ

Светлана дьоллоох Дьокуускайга улааппыт. Куорат 9 №-дээх оскуолатын ситиһиилээхтик түмүктээн, Москва куоракка аатырар Норуоттар доҕордоһууларын университетыгар (РУДН) экэнэмиис идэтигэр үөрэммит. Төрөппүттэрэ урбаанньыттар эбит, саастарын тухары нэһилиэнньэни аһынан хааччыйыы эйгэтигэр үлэлээбиттэр. Ол да иһин буолуо, кыыс үөрэҕин бүтэрээт, икки сыл Дьокуускайга чааһынай оҕо саадын арынан үлэлэппит. Ол кэннэ, омук тылын үөрэппит дьоҕурун туһанан, Кытайтан таҥас аҕалан атыылыы сылдьыбыт. Аныгы үйэ сиэринэн, табаара интэриниэт нөҥүө атыыга хамаҕытык бара турбут. Бу холонуулар бары кыыска тус бэйэҕэ үлэлиир ордук кэрэхсэбиллээҕин, умсугутуулааҕын итэҕэтэн испиттэр.

ДЬИЭ КЭРГЭНИМ МИИГИН ӨЙҮҮР

Светлана этэринэн, бизнес эйгэтигэр, дьиэ кэргэн өйөөтөҕүнэ эрэ, ситиһии кэлэр. Ол курдук, кэргэнэ Дмитрий эмиэ тус дьыалалаах буолуон уруккуттан баҕарарар эбит. Эдэр дьону бастаан төрөппүттэрэ өйөөн, үбүнэн көмөлөһөн, үлэлээн киирэн барбыттар –  бизнес-былаан оҥостон, куораттааҕы урбаанньыттары өйүүр киин ыытар тэрээһинигэр кыттан саҕалаабыттар.

ИНКУБАТОР

2017 сыллаахтан Бизнес-инкубаторга үс сылга үлэлиир миэстэлэнэн, көмпүүтэрдэнэн, төлөпүөнүнэн хааччыллан, 7 киһиэхэ үлэ миэстэтин таһааран, хамнас төлөөн олорбуттар. Бэлиэтээн эттэххэ, бу Бизнес-инкубаторга дьарыктаммыт дьон 80%-на урбаан эйгэтигэр хаалар.

БИЗНЕС КЫҺАЛҔАТА

- Этэллэрин курдук, бизнес диэн бизнес, биир күн баар, сарсын туох да суох буолуон сөп. Биһиги бизнеспитигэр куруук сайда туруохха наада. Холобура, айтишниктары, суруналыыстары, экэнэмиистэри, буҕаалтырдары уо.д.а. идэлэри эбии үөрэтиэхпитин баҕарабыт. Куораппытыгар конкуренция үөскээн эрэр. Ханнык баҕар тэрилтэ конкуреннардаах, бу – биһиги кыһалҕабыт. Кыһалҕаттан куттанымыахха наада, бу олоххо, ордук бизнес эйгэтигэр, ыарахаттар син биир бааллар. Ол эрээри киһи сатаабатаҕа суох. Барытын боруобалаан, ымпыктаан, ыйааһыннаан көрүөххэ наада.

САЛАЙААЧЧЫ ХАЙДАХ БУОЛУОХТААҔЫЙ?

– Салайааччы хайаан да былааннаах буолуохтаах. Былаан быһыытынан үлэлиэхтээх. Дьоҥҥо үчүгэйдик сыһыаннаһыахтаах. Салайааччы, уопсайынан,  психолог буолуохтаах дии саныыбын. Үлэһиттэригэр тэрилтэ сыалын ситиһэрин туһугар биир өйү-санааны үөскэтиэхтээх. Киһи туохха кыахтааҕын, туохха ордук дьоҕурдааҕын бэлиэтии көрүөхтээх уонна үлэлиир усулуобуйатын тэрийиэхтээх, сынньанар бириэмэни биэриэхтээх. Салайааччы дьаһайарынан эрэ муҥурдаммакка, үлэһиттэрин кытары тэҥҥэ үлэлиэхтээх.

-Ааҕааччыларга баҕа санааҥ?

– Хас биирдии киһи туохха эрэ ананан төрүүр. Ону кыра оҕо сааһыттан таба көрөн, сайыннарыахха наада. Киһи бэйэтин көрдөнөн булар. Сорох дьон олус уһуннук булкуллан, ускул-тэскил сылдьан баран биирдэ бэйэлэрин суолларын таба тайаналлар. Онуоха тулуурдаах, дьаныардаах буолуохха наада, оччоҕо хайаан да сыыйа үрдүккэ тахсыахха сөп. Урбаанньыт буоларга, бастатан туран, доруобай, чэгиэн-чэбдик буолуохха наада. Дьону кытары тапсыҥ, чөл олоҕу тутуһуҥ, спордунан дьарыктаныҥ. Киһи киһини кытары куоталастаҕына, олоххо тардыһыыта күүһүрэр. Түмүкпэр хас биирдии киһиэхэ сөбүлүүр дьыалаҕытынан дьарыктаныҥ диэн баҕа санаабын тиэрдэбин. Билиҥҥи үйэҕэ көмө бөҕөтө көрүллэр, харса суох киирсэн иһиҥ уонна санааҕытын түһэримэҥ, үөрэ-көтө сылдьыҥ!

Светлана “Саха сирин киэн туттуута буолар” норуот бириэмийэтигэр кытта сылдьар. Билигин биэс бастыҥ иһигэр киирбит.

Светлана Семенова «Киин куорат» ааҕааччыларыгар бэйэ дьыалатын арынарыгар, суолун булунарыгар көмөлөспүт кинигэрин сүбэлиир:

-         “Мой продуктивный день”

“Думать и богатеть”

“7 навыков эффективных людей”

“Ты и бизнес”

“Жинзь и бизнес”

“Люди делают...”

Сөбүлүүр аһа: ийэтэ астаабыт бэрэскитэ уонна фирменнай минньигэстэрэ.

Сөбүлүүр киинэтэ: сахалыы киинэлэр. Бүтэһик көрбүт киинэтэ – «Мин үрдүбэр күн хаһан да киирбэт”.

Сөбүлүүр дьарыга: Ас астыырын ордорор уонна дьиэ кэргэнинэн айылҕаҕа сылдьарбын сөбүлүүр.

Сонуннар

Ордук ааҕаллар

Саха снайпера Пантелеймон Руфов
Дьон | 11.07.2021 | 11:30
Саха снайпера Пантелеймон Руфов
Пантелеймон Руфов Үөһээ Бүлүүттэн төрүттээх, Руфовтар иллээх  дьиэ кэргэттэригэр төрдүс уол оҕонон төрөөбүт. Кини билигин Рязань куоракка аармыйа генерала Василий Филиппович Маргелов аатынан воздушно-десантнай гвардейскай училищены бүтэрэн кэллэ. Бу саха оҕотугар олус сэдэх көстүү буоларынан сибээстээн эһиэхэ Пантелеймоннуун кэпсэтиибин таһаарабын. - Биэс сыллаах үөрэҕи бүтэрдим. Манна офицердар, спецназтар иитиллэн үөрэнэн...
Баһылык итирдэр утахтары атыылыыр быраабылаларга сыһыаннаах этии киллэрдэ
Сонуннар | 15.07.2021 | 13:00
Баһылык итирдэр утахтары атыылыыр быраабылаларга сыһыаннаах этии киллэрдэ
Куорат баһылыга Евгений Григорьев уопсастыбаннай аһыыр сирдэри кэҥэтэр уонна арыгы атыылыыр сирдэри социальнай эбийиэктэртэн тэйитэр туһунан этии киллэрдэ. Ол туһунан кини «Сахамедиа» медиа-кииҥҥэ ыытыллыбыт «Дополнительные ограничения времени, условий и мест розничной продажи алкоголя в Якутии» дискуссияҕа эттэ.  Баһылык ВОЗ дааннайдарынан арыгыттан сылтаан өлүү Арассыыйа 100 тыһыынча олохтооҕор ылан көрдөххө эр...
Дойдууна: «Сулус — халлааҥҥа, киһи — сиргэ»
Дьон | 17.07.2021 | 13:00
Дойдууна: «Сулус — халлааҥҥа, киһи — сиргэ»
Кинини  айылҕаттан ураты экстрасенс, сүппүт дьону булааччы быһыытынан сахалар эрэ буолбакка, өрөспүүбүлүкэ тас өттүгэр олорооччулар эмиэ билэллэр. Бүгүҥҥү кэпсиир дьоруойум “Саха сирин экстрасенстара – 2015” күрэххэ “Лучший экстрасенс Якутии” ааты сүкпүт ДОЙДУУНА. Дойдууна элбэх оҕолоох ыалга төрөөбүтэ, кинилэр бииргэ төрөөбүт тохсуолар. Хаҥалас улууһа киинэ түспүт, сиргэ үктэммит дойдута буолар. Ийэтэ...
Бары күүһү ойуур баһаардарын утары!
Сонуннар | 12.07.2021 | 11:30
Бары күүһү ойуур баһаардарын утары!
От ыйын 9 күнүгэр "Марха өрүс көмүскээччилэрин" түмсүүтэ Дьокуускай куорат общественниктарын, Ил Түмэн дьокутааттарын, СӨ бырабыыталыстыбатын, Дьокуускайдааҕы Дума, Общественнай Палата чилиэннэрин, суруналыыстары, блогердары, улуустар землячестволарын көҕүлээччилэрин, улуустар бэрэстэбиитэллэрин, бары тэрилтэ үлэһиттэрин кытта көрсөн Горнай, Ханалас уонна да атын улуустарга улахан ойуур баһаардара турбуттарынан, Бүлүү федеральнай суол кылгас кэмҥэ сабылла сылдьыбытынан...