Бэйдиэ сылдьар кыыллар кыһалҕалара уҕараабат

Дьэллик кыыллары тутар пуун – Очиченко уулуссатын 57 нүөмэригэр баар ППЖ филиалын тэрийии – куорат биир тыын кыһалҕата. Сыллата көрүүтэ-харайыыта суох бэйдиэ сылдьар ыт ахсаана элбээн иһэрэ дьиксиннэрэр. Куорат араас муннугар, чуолаан кытыы сирдэргэ ыт үөрүттэн дьон эмсэҕэлээбит түбэлтэтэ үгүс. 
Бүгүҥҥү туругунан өрөспүүбүлүкэбит киинигэр Дьокуускай куоракка ити кыһалҕаны туоратарга араас толкуйдар бааллар. Ол курдук, чааһынай приюттары тутарга бүддьүөтү таһынан үбүлээһин боппуруоһа үөрэтиигэ сылдьар. Куорат Уокуруктааҕы дьаһалтатын иһинэн үлэлиир олох-дьаһах хомунаалынай  хаһаайыстыбатын Департамена Сир сыһыаннаһыыларыгар Агентствоҕа, ону сэргэ Баай-дуол уонна сир сыһыаннаһыыларын Департаменыгар чааһынай приюту тутарга сир учаастактарын тыырар туһунан кэккэ сүбэлэри биэрбитэ. 
Ити иннинэ куорат Уокуруктааҕы дьаһалтатын иһинэн үлэлиир Олох-дьаһах хомунаалынай  хаһаайыстыбатын уонна СӨ ветеринарияҕа Департаменнара, ону сэргэ “Помоги выжить” аһымал пуонда бииргэ түмсэн, бэйдиэ кыыллар кыһалҕаларын тула кэпсэппиттэрэ.
Манна даҕатан эттэххэ, быйылгы 2021 сылга ППЖ нөҥүө 717 ыт тутуллубут. Олортон 176 ыты дьон аҕалан туттарбыт, 541 ыты тэрилтэ бэйэтин үлэһиттэрэ тутан аҕалбыттар. ОСВВ бырагырааманан (отлов-стерилизация-вакцинация-выпуск) 495 ыт ааспыт, 317-тэ кыыл саҥа хаһаайыннаммыт уонна урукку хаһаайыттарыгар төннөрүллүбүт.
Дьокуускайдааҕы дьэллик кыыллары тутар пуун (ППЖ) дириэктэрэ Екатерина Безрученко этэринэн, ыттары оннооҕор атын сиртэн, холобур, Покровскайтан уонна Намтан кытта аҕалаллар эбит.
«Харамайдарга эппиэтинэстээх сыһыан туһунан» федеральнай сокуон саҥа ирдэбиллэригэр олоҕуран Дьокуускайдааҕы дьэллик кыыллары тутар пуун (ППЖ) үлэтэ өссө уустугуран биэрбит, наһаа элбэх кыыл (үксэ ыт) тутуллар буолан, турар усулуобуйалара нуормаҕа эппиэттээбэт. ОСВВ бырагырааманан тутуллубут харамай дьиэ иһигэр 30 күн олоруохтаах эбит. Аны тыһы ыттар стерилизация эппэрээссийэтин кэнниттэн  сылаас сиргэ тутуллаллара ирдэнэр. 
Тоһуттар тымныылаах Сахабыт сиригэр тыыннаах харамайы ППЖ-га олорор болдьоҕо ааста диэн таһырдьа ыытар уустуктардааҕа биллэр. Арассыыйа киин регионнарыгар итинник кыһалҕа турбат. Итинэн сиэттэрэн кыһыҥҥы саамай тымныы ыйдарга кыыллары тутар пуун нуорманы таһынан туолан кэккэ ыарахаттары көрсөрө биллэр суол. 
«Саҥа филиал арыллара буоллар, биһиги ыт оҕолорун уонна кыра боруода ыттарын туспа тутуо этибит, кинилэргэ саҥа хаһаайын көстөрүгэр филиал төһүү күүс буолуо этэ», - диэн Екатерина Безрученко санаатын үллэстэр. Итини сэргэ үлэлии турар пууну улаатыннарар кыһалҕа сытыытык турар. Манна даҕатан эттэххэ, харамайдары тутар пуун дьон олорор сириттэн кырата 150 миэтирэ тэйиччи буолуохтаах. 
Приют тутарга анаан сир бэриллэн, сытыытык турар кыһалҕа сотору кэминэн быһаарыллар ини диэн эрэл кыыма баар.