Бэйдиэ сылдьар кыыллар дьылҕалара эмиэ салгыҥҥа ыйанна

Дьокуускайдааҕы көрүүтэ-истиитэ суох кыыллары быстах болдьоххо тутар пуун “Фонд помощи животным” тэрилтэҕэ туттарылларын туһунан эрдэ иһитиннэрэн турабыт. Ол эрэн бу тэрилтэ бүгүн пууну тутар эбээһинэстэн толору аккаастанарын биллэрдэ.

Бүгүн дьаһалтаҕа кыыллары көмүскүүр актыбыыстары кытта төгүрүк остуол буолан ааста. Көрсүһүүгэ Дьокуускай баһылыгын ОДьКХ солбуйааччы Роман Сорокины кытта “Белый Бим” уонна “Помоги выжить” тэрилтэлэр бэрэстэбиитэллэрэ кытыннылар. Дьаһалта кыыллары тутар пууну бас билиилэригэр ылыан баҕалаахтарга хаттаан куонкурус ыытыаҕа.

Куонкурус кыайыылаахтара босхо пуун дьиэтин, сирин, араас эбийиэктэрин, контейнердары, гаас уонна электричество ситимнэрин бас билиигэ ылыахтара. Маны тэҥэ 23 мөл. солк. суумалаах субсидия көрүллүөҕэ. Маны барытын босхо ыларын суотугар, куонкуруһунан кыайан Кыыллары быстах болдьоххо тутар пууну бас билиигэ ылбыт тэрилтэ, бэйдиэ сылдьар кыылары тутар, харайар, иитэр, вакцинациялыыр, стерилизациялыыр, маркировкалаан баран босхо ыытар эбээһинэстэнэр.