Бэс ыйын кэккэ уларыйыылара

— Сайыҥҥы веранда кафеларга уонна эрэстэрээннэргэ аһыы утаҕы атыылыыр көҥүллэннэ. Сүрүн ирдэбил – веранда кафеҕа эбэтэр эрэстэрээҥҥэ сыста эбэтэр биир тиэргэҥҥэ турар буолуохтаах.

— Бэс ыйын 1 күнүттэн медиктэр уонна педагогтар Уһук Илин уонна Арктика ипотекатын ылаллара судургу буолла – мантан ыла үлэ ыстааһа учуоттаммат.

Ону таһынан, бэс ыйыттан анал байыаннай дьайыы кыттыылаахтара уонна өлбүт байыаннайдар дьиэ кэргэттэрэ Уһук Илин уонна Арктика ипотекатын ылар кыахтаннылар. Онуоха кирэдьиит ылар дьон саастара уонна дьиэ кэргэн балаһыанньата учуоттаммат буолла.

— Оҕо лааҕырыгар барарга ирдэнэр ыспыраапка халыыба уонна толоруллар бэрээдэгэ уларыйда. Мантан ыла ыспыраапкаҕа оҕо ханнык сыстыганнаах уонна сыстыгана суох ыарыынан ыалдьыбыта ыйыллар, эпэрээссийэ, эчэйии, аллергия туһунан, ону тэҥэ физкултуураҕа ханнык бөлөххө сылдьара, педикулеһы уонна чесотканы бэрэбиэркэлиир көрүү түмүгэ кытта суруллар буолла.