Бэртээхэй да идэ — бэтэринээр

Муус устар 30 күнүгэр Бэтэринээр күнэ буолан ааста. 
Бу идэ биһиэхэ, сүөһүлээх-сылгылаах сахаларга, олус чугас. Биһиги Хатаспатыгар былыр-былыргыттан бэтэринээрдэр баар буоланнар, устуоруйаҕа киирбит аймалҕаннаах, элбэх сүтүктээх бруцеллез, сэллик курдук сыстыганнаах ыарыылар суох буолбуттара. Ама да ааспытын иһин, улахан хоромньуну таһаарбыт ыарыыны суох гынаары, саҥа атахха туран кэҥээн-тэнийэн эрэр хаһаайыстыбалары эһэн, хаттаан төрөтөн-ууһатан, урукку ахсааны ситэри ааһан, аһара барыы, бородууксуйаны ылыы (үүт да, эт да өттүнэн), көрдөрүүлэри үрдэтии төһөлөөх сыраттан тахсыбыта буолуой?!
Бүгүн биһиги бэтэринээр идэлээх Михаил, Людмила, Клавдия, Васса Решетниковтар бөдөҥ династияларын, кэргэннии Иван, Татьяна Абрамовтар, Андрей, Федора Никифоровтар, Евдокия, Михаил Баишевтар, Николай, Ирина Чиряевтар, Елена, Василий Мокрощуповтар, Ирина Баишева, Вера Потапова, Афанасий Аргунов, Иван Мордовской, Людмила Чахова, Евдокия Попова, Мария Соболева, Фекла Оконешникова, Семен Алексеев, Надежда Шелковникова,  Людмила Игнатьева, Людмила Портнягина уо.д.а. ааттарын киэн тутта ахтабыт. Бары да чулууттан чулуу, астык дьон.
Юрий, Татьяна Гуляевтар Хатас сиригэр-уотугар 2012 сылтан бу сулууспа үлэтин баһылаан-көһүлээн илдьэ сылдьаллар. Кэргэнниилэр бэтэринэриийэ эйгэтигэр 1996 сылга Дьокуускайдааҕы тыа хаһаайыстыбатын техникумун дипломун ылыахтарыттан илиилэрин араарбакка үлэлииллэр-хамсыыллар. Кэлин иккиэн үрдэтинэн, билигин үрдүк үөрэхтээх исписэлиистэр. Юрий Пантелеймонович — түбүктээх үлэтин быыһыгар нэһилиэк уопсастыбаннай олоҕун көхтөөх кыттыылааҕа – быыбар хамыыһыйатыгар үлэлиир, Сахабыт сирин киэҥ эйгэҕэ таһаарбыт тоҥ балык да күрэҕэр Хатас аатыттан кыайыылаахтык кыттыталаабыта, «Поем, танцуем со звездами» диэн бырайыакка да ыллаабыта, Байанай күрэҕэр да баар буолааччы. Аҕыйах сыллааҕыта эдэр сылгыны өлөр ыарыыттан быыһыыр эмтээһини оҥорон, эмиэ элбэхтик кэпсэммитэ, көстүбүтэ. Юрийдаах Татьянаны эйэҕэс-сайаҕас майгыларын, сатабылларын иһин  Хатаска сүөһүлээх-астаах дьоммут бары да махтаналлар, сылаастык, сымнаҕастык саныыллар.