Бэлэм тиэстэттэн араас бүлүүдэ

Маҕаһыыҥҥа атыыланар бэлэм слоенай тиэстэттэн араас эриэккэс бүлүүдэлэри олус түргэнник уонна судургутук астыахха сөп. Соһуччу ыалдьыттар кэллэхтэринэ, ыксалга ыһык бэлэмнии охсорго бу тиэстэ олус табыгастаах буолан, хаһаайкалар морозильникка хаһаана сылдьан тутталлар.
Астыахпыт иннинэ тиэстэбитин кыратык тэнитэн, хаптатан биэрэбит.

Торт

Тиэстэбитин наһаа хаптаппакка, духуопкаҕа буһарабыт. Варенай сгущенканы уонна сүөгэйи холбоон, кириэм оҥоробут. Коржиктарбытын сыбыы-сыбыы, үрүт үрдүгэр уурталаан кэбиһэбит. Дьапталҕаларын быыһыгар ханнык баҕарар минньигэс отону, сакалааты, фруктаны угуохха сөп. Кириэмин иҥэрэн туруора түһэбит уонна остуолга биэрэбит.

Лууктаах тарт

Тарт диэн аһаҕас бөрүөк курдук астанар бүлүүдэ. Тиэстэбитин 15 мүнүүтэ духуопкаҕа уган ылабыт. Буспутун кэннэ ыһаарыламмыт луугу уонна чесногу, килька кэнсиэрбэтин (эбэтэр ханнык баҕарар балык, куурусса этэ, халбаһы барсар), маслиналары уурабыт уонна эмиэ 15 мүнүүтэ духуопкаҕа угабыт.

Слойка

Сокуускаҕа бэркэ барсар. Слоенай тиэстэ икки устууката наада буолар. Төгүрүктүү бысталыыбыт, иккилии хос уурабыт. Ол үрдүн кетчубунан сыбыыбыт, халбаһы, сыыр уурабыт, сымыыт уоһаҕынан сотобут, кунжут сиэмэтин таммалатабыт. Духуопкаҕа сүүрбэччэ мүнүүтэ буһарабыт.

«Брецель» пицца

Сокуускаҕа бэркэ барсар. Слоенай тиэстэ икки устууката наада буолар. Төгүрүктүү бысталыыбыт, иккилии хос уурабыт. Ол үрдүн кетчубунан сыбыыбыт, халбаһы, сыыр уурабыт, сымыыт уоһаҕынан сотобут, кунжут сиэмэтин таммалатабыт. Духуопкаҕа сүүрбэччэ мүнүүтэ буһарабыт.

Фритюрга буспут пончиктар

Слоенай тиэстэни үс хос тутан төгүрүктүү быһабыт, ортотун хайаан да хайаҕастыыбыт. Оргуйа турар арыыга фритюрга саһарчы буһарабыт. Ууллубут сакалаатынан кутабыт, киэргэтэбит.

«Твистер» сосиска

Сосискалары аҥаардаан шпажкаҕа кэтэрдэбит, сытыы быһаҕынан спираль быһыылаах гына быһабыт. Быыһыгар слоенай тиэстэни бысталаан эрийэбит. Пергамеҥҥа ууран, сымыыт уоһаҕынан оҕунуохтаан духуопкаҕа 20-25 мүнүүтэ буһарабыт. Ханнык баҕарар соуһу кытта остуолга биэрэбит.

Мокоруоннаах рожок

Фольганан форма оҥорон, онно слоенай тиэстэтин уһаты быһыталаан, эрийэн, рожоктары оҥорон, духуопкаҕа 20-25 мүнүүтэ устата буһарабыт. Буспут мокоруону сыырдыыбыт, сөбүлүүр соуспутун кутабыт, ыһаарыламмыт бекон эбэбит. Пастабытын буспут рожокка кутабыт уонна күөх тумалыыбыт.

Ветчиналаах рулет

Слоенай тиэстэни хартыыһанан сыбыыбыт. Ветчинаны кырбаан, сыыры теркалаан, туустаах корнишон оҕурсу, помидор, онтон эмиэ сыыр дьапталҕанан уурабыт. Кытаанах рулет гына эрийэбит, кытыытын кымаахтаан сыһыартаан биэрэбит. Сымыыт уоһаҕынан оҕунуохтуубут, кунжут сиэмэтин таммалатабыт уонна 25 мүнүүтэ духуопкаҕа уган ылабыт. Остуолга сылаастыы биэрэр ордук.

Дьаабылыкалаах слойка

Бастаан кубиктыы быһыллыбыт дьаабылыкалары карамелизациялыыбыт – ол аата ынах арыытын хобордооххо уулларан, саахардаан, корицалаан, дьаабылыкабытын онно ыһаарылыыбыт. Слоенай тиэстэни түөрт гына бысталыыбыт, аҥаарыгар дьаабылыкабытын ууран, сабар өттүбүтүн хайаҕастаах гына бысталаан сабабыт. Слойкабыт духуопкаҕа 20 мүнүүтэ буһар. Таһааран баран саахар пудратын таммалатабыт.

«Лодочка»

Слоенай тиэстэттэн “лодочкалары” оҥорон баран пюреламмыт хортуоппуйу, ыһаарыламмыт эти уонна туустаах оҕурсуну уурабыт. Ытыйыллыбыт сымыытынан оҕунуохтаан баран 15 мүнүүтэ духуопкаҕа буһаран ылабыт. Остуолга биэрэрбитигэр күөх тумалыыбыт.

Тиэстэнэн өрүллүбүт сосиска

Тиэстэбитин тэнитэ түһэн баран кытаанах сыыры чараастык бысталаан үрдүгэр уурабыт. Онтон сосискабытын тиэстэ полоскаларын кытта хаартыскаҕа курдук ууран баран сымыыт уоһаҕынан оҕунуохтуубут уонна 20 мүнүүтэ духуопкаҕа буһарабыт. Кунжут сиэмэтин таммалатыахха сөп.

Круассан

Слоенай тиэстэни үс муннуктуу быһабыт, ханнык баҕарар сакалааты ууран баран круассан курдук эрийэбит. 12-15 мүнүүтэ духуопкаҕа уган ылабыт. Буһан тахсыбытын кэннэ кыра хайаҕастаан иһигэр нуттелла кутабыт. Үрдүгэр саахары таммалатабыт. Остуолга биэрэргэ отонунан киэргэтиэххэ сөп.

Эриэккэс пицца

Шпажкаҕа уһун синньигэс гына бысталаммыт тиэстэни кэтэрдэбит. Хаартыскаҕа көстөрүн курдук уочаратынан анньан иһэбит: халбаһы, болгарскай биэрэс, черри помидор. Араас тумалаах мас арыытынан сыбаан баран теркаламмыт сыыры кутабыт (ордук моцарелла сыыр барсар). Духуопкаҕа 15 мүнүүтэ буһарабыт.

Иһиттээх пицца

Слоенай тиэстэни түөрт муннуктарга бысталыыбыт, кекс буһарар формаларга уурабыт. Ханнык баҕарар начыынныахха сөп: халбаһы+сыыр, помидор+сыыр, буспут эт+оҕуруот аһа о.д.а.

Хас биирдии квадраппытын томат соуһунан сотобут, начыыммытын ууран баран духуопкаҕа 15 мүнүүтэ устата буһарабыт.

Балыктаах бөрүөк

Слоенай тиэстэни тэнитэн, формаҕа уурабыт. Бөдөҥнүк кырбастаммыт буспут сымыыты, луугу кытта ыһаарыламмыт семга балыгы (эбэтэр ханнык баҕарар уҥуоҕа суох балык барсар)  уурабыт. Бөрүөкпүт үрдүн араастаан киэргэтэбит, кунжут сиэмэтин таммалатабыт. 30 мүнүүтэ устата духуопкаҕа буһарабыт.

Эттээх бөрүөк

Чараас гына быһыллыбыт эти сымнатан “кырбыы” түһэбит, 15 мүнүүтэ устата уксустаах тууска, оливка арыытыгар маринуйдуубут. Эппитин уонна тиэстэбитин уһун синньигэс гына бысталыыбыт уонна саахыматтыы сааһылаан уурабыт. Духуопкаҕа 30 мүнүүтэ устата буһарабыт.

Винегреттээх бэрэски

Түөрт муннуктуу быһыллыбыт тиэстэҕэ винегрети кутан бэрэскилэри оҥоробут, кытыытын биилкэнэн баттаан сыһыарабыт. Сымыытынан оҕунуохтаан, кунжут сиэмэтин таммалатан, духуопкаҕа 25 мүнүүтэ буһарабыт.