Бэдэрээччик Каландаришвили уулуссатын өрөмүөнүгэр эрдэттэн бэлэмнэнэр

Эһиил 2022 сылга, Дьокуускай куоракка, «Куттала суох уонна хаачыстыбалаах суоллар» национальнай бырайыак чэрчитинэн, 34 км кэриҥэ уһуннаах суолу нуормаҕа эппиэттиир турукка киллэрии былааннанар. Барыта 31 эбийиэк өрөмүөннэниэхтээх. Бу туһунан Уокуруктааҕы дьаһалта пресс-сулууспата иһитиннэрдэ. 
Киин куорат хорук тымырыгар тэҥнээх кылаабынай суолун – Ленин проспегын Хабаров уул., Краснояров уул. диэри учаастагар өрөмүөннүөхтэрэ. Бэдэрээччик – «Дорстрой» ХЭТ. Билиҥҥи кэмҥэ проспект аннынан «Водоканал» АУо 1 №-дээх канализация коллекторын өрөмүөннүүр.  
Кэлэр сылга «РИК Автодор» АУо Речевой оскуолаҕа чугаһыыр суолу, Федор Попов уул. уонна Энергетик уул. быһа охсуһуутугар Богдан Чижик уул. Кальвица уул. диэри өрөмүөнү салҕыахтара. Поярков уулуссатын Дзержинскэй уул. Октябрьскай уул. диэри учаастагын өрөмүөнүн, ону сэргэ Пирогов уулуссатыгар Петр Алексеев уул. Жорницкай уул. диэри уонна Ильменскай учаастагын Чайковскай уул. Билибин уул. диэри капитальнай өрөмүөнү «Сахатрасстрой» ХЭТ оҥоруоҕа.
Бүгүҥҥү күҥҥэ Каландаришвили уулуссатыгар бэдэрээччик «Сахатрасстрой» ХЭТ бэлэмнэнии түһүмэҕин эрдэттэн саҕалаата. Ленин проспегыттан Белинскэй уул. диэри 70% бортовой уонна тротуар таастара оҥоһуллубут,  тротуар 50% хайыр тааһынан кутуллубут. Быйылгы сылга матырыйаал кэлэрэ былааннаммыт. Каландаришвили уул. аспааллааһына эһиилгиттэн саҕаланар. 
«Биллэрин курдук, Дьокуускайга тутуу сезона кылгас, ол иһин суол үлэһиттэрэ кылгас кэмҥэ улахан кэриҥнээх үлэни оҥоро сатыыллар. Каландаришвили уулуссатын холобура эһиилги суол өрөмүөнүгэр эрдэттэн бэлэмнэниэххэ сөбүн көрдөрөр», – диэн этэр куорат баһылыга Евгений Григорьев.