Байыаннай сулууспалаахтар дьиэ кэргэттэрин өйүүр аахсыйа ыытылынна

Саха сиригэр Ийэ күнүгэр анаммыт тэрээһиннэр чэрчилэринэн, Өрөспүүбүлүкэтээҕи оҕолор уонна эрдэҕэс оҕолор доруобуйаларын чөлүгэр түһэрэр кииҥҥэ, байыаннай дьайыы кыттыылаахтарын дьиэ кэргэттэрин өйүүр «Ийэҕэ махтал» аһымал аахсыйа ыытылынна диэн Өрөспүүбүлүкэ баһылыгын уонна бырабыыталыстыбатын пресс-сулууспата иһитиннэрдэ.

Аахсыйа туһунан Өрөспүүбүлүкэтээҕи оҕолор уонна эрдэҕэс оҕолор доруобуйаларын чөлүгэр түһэрэр киин дириэктэрэ Зинаида Максимова кэпсээтэ.

«Байыаннай эпэрээссийэ кыттыылаахтарын дьиэ кэргэттэригэр анаан А.Е.Кулаковскай аатынан Норуоттар доҕордоһууларын дьиэтин исписэлииһэ, Саха сирин Ыччатын ассамблеятын уонна Нуучча общинатын чилиэнэ Анастасия Найда «Удьуор төрүччүтүн оҥоруу» диэн маастар-кылааһы ыытта. Итини таһынан, «Мин бизнеһим» киин хантыраагынан бэйэ дьыалатын арыйарга, бизнеһи саҕалыырга сүбэ-ама биэрдэ. Маннык тэрээһиннэри тиһиктээхтик ыытары былаанныыбыт», – диэтэ кини.

Зинаида Максимова бэлиэтээбитинэн, Ил Дархан Айсен Николаев сорудаҕынан, быйыл олунньу 20 күнүттэн Өрөспүүбүлүкэтээҕи оҕолор уонна эрдэҕэс оҕолор доруобуйаларын чөлүгэр түһэрэр кииҥҥэ байыаннай дьайыы кыттыылаахтарын оҕолорун уонна арыаллыыр дьиэ кэргэттэрин чилиэннэрин чөлүгэр түһэрии ыытыллар. Ол курдук, чөлүгэр түһэриини 18 саастарыгар диэри оҕолор уонна сокуоннай бэрэстэбиитэллэрэ, стационарнай уонна «полустационарнай» көрүҥүнэн, 21 күн устата ааһаллар.

«2023 сыл сэтинньи 16 күнүнээҕи туругунан, Кииҥҥэ чөлүгэр түһэриини байыаннай эпэрээссийэ кыттыылаахтарын дьиэ кэргэттэрин 155 чилиэнэ ааста,  ол иһигэр 57 улахан киһи уонна 98 оҕо. Оҕолору кытта инструктордар уонна лечебнэй физкультура быраастара үлэлииллэр, араас дьарыктар ыытыллаллар, холобур, коррекционнай педагогика, арт-терапия, ритмика уо.д.а. Оҕолор бассейнҥа сылдьаллар,  виртуальнай технологияны туһанан ыытыллар VR интерактивнай дьарыктары сөбүлүүллэр, ити араас тиэмэлээх: виртуальнай зоопаркаҕа, Ван Гог үлэлэрин быыстапкатыгар «сылдьыахтарын», космодромтан ракета көтөн тахсарын көрүөхтэрин сөп», – диэн кэпсээтэ Зинаида Максимова.  

Төрөппүттэргэ уонна сокуоннай бэрэстэбиитэллэргэ чөлүгэр түһэрии туспа бырагыраамата көрүллэр.