Байыаннай дьайыы кыттыылаахтарын оҕолоро үрдүк стипендияны ылаллар

Үөрэҕирии эйгэтин өттүттэн байыаннай дьайыы кыттыылаахтарын оҕолоругар социальнай өйөбүл 5 миэрэтэ көрүллэр диэн өрөспүүбүлүкэ үөрэҕириигэ уонна наукаҕа миниистирин бастакы солбуйааччыта Михаил Присяжнай иһитиннэрдэ.

«Байыаннай дьайыы кыттыылаахтарын оҕолоругар барыта социальнай өйөбүл 5800 тахса миэрэтэ оҥоһулунна», – диэтэ Михаил Присяжнай.

Бүгүҥҥү күҥҥэ байыаннай дьайыы кыттыылаахтарын оҕолорун тус сыаллаах (целевой) үөрэтии туһунан техникумнары, колледжтары уонна үрдүк үөрэх кыһаларын кытта 130 дуогабар түһэрсиллэр буолла.

Итиэннэ төрөппүтэ байыаннай эпэрээссийэҕэ сылдьар кэмигэр 442 үрдүк уонна орто үөрэх кыһаларын устудьуоннарыгар үрдүк стипендия олохтонно.

Итини таһынан, Михаил Присяжнай Ил Дархан Айсен Николаев ыйааҕар олоҕурбут өйөбүл  13 миэрэлэриттэн 11-рэ – үөрэҕирии эйгэтигэр диэн бэлиэтээтэ. Өйөбүл миэрэлэринэн туһаныы категорията кэҥээн иһэр. Сайабылыанньалары «Мин докумуоннарым» (МФЦ) офис эбэтэр е-якутия портал нөҥүө биэриэххэ сөп.