Баттаҕы уһатар, хоһоҕону сүтэрэр судургу ньыма

Дьаабылыка уксууһа норуокка олус туһалааҕынан биллэр. Көннөрү шампунь кыайбатын кыайар дииллэр. Кырдьыга даҕаны, аныгы бородууксуйалары тугунан-тугунан оҥороллоро биллибэт. Эбиитин экологиябыт айгыраан, дьон доруобуйата мөлтүүр, кэбириир.

Бу абыраллаах уксуус хоһоҕону сүтэрэр, баттаҕы уһатар, кылабачытар, сымнатар күүстээх. Аптаах сириэстибэ туһатын ааҕан сиппэккин, төһө баҕарар уһуннук субурутуохха сөп. Онтон бэрт аҕыйаҕы билиһиннэрэбит.

Баттаҕыҥ хоһоҕолонор, куйахаҥ хатыран кыһыйар буоллаҕына, дьаабылыка уксууһа көмөлөһүө.

Бу уксууһунан баттаҕы сайҕаныы ханнык баҕарар сыаналаах кондиционеры солбуйар кыахтаах. Баттаҕы сымнатар, кылабачытар.

Баттаҕы түргэнник уһатар. Баттах фолликулалара  бүөлэнэн хаалбыт буоллахтарына, түһэр эбит. Бу натуральнай сириэстибэнэн сайҕаннаххытына, баттаҕы төрдүттэн эмтиир, кытаатыннарар. Онон суһуоххут сымыйанан эппит курдук түргэнник уһуоҕа.

Баттах төбөтө алдьанара, түһэрэ аччыаҕа.

Сөпкө сайҕаныҥ

Маҕаһыынтан сиидэлэммэтэх, ыраастамматах, фильтрэ суох, болоорхой өҥнөөх дьаабылыка уксууһун талан атыылаһабыт. Бэйэҕит да оҥостуоххутун сөп. Бэрт судургу.       

Икки остолобуой ньуоска дьаабылыка уксууһун биир ыстакаан ууга суурайабыт, үчүгэйдик булкуйабыт. Онтон элбэх наада буоллаҕына, 1 лиитирэ ууга 1/3 ыстакаан уксуус сөп. Ыстарардаах бытыылкаҕа кутаҕыт.

Хайдах туһанабыт?

Баттаххытын суунан баран бу оҥорбут сириэстибэҕитинэн сайҕаныҥ, куйахаҕытын уонна суһуоххутун массаастаан биэриҥ. Аҕыйах мүнүүтэ тута түһүҥ, онтон кичэйэн суунуҥ.

Бу суурадаһыны хараххытыгар киллэрбэт буола сатааҥ. Баттах куурар кэмигэр уксуус сыта кэлиэн сөп, долгуйумаҥ, ааһыаҕа, сүтүөҕэ.

Лаванда эбэтэр розмарин эбэн, сытын тупсарыахха сөп. Баттаххыт биллэ уһуоҕа. 

Луук эмиэ эмтиир

Баттаҕыҥ түһэр, уһаабат буоллаҕына, эйиэхэ луук суога көмөлөһүөҕэ. Америка дерматологтара алопецияны (баттах түһүүтэ) туох да эмэ суох, аҥаардас луугунан эмтиэххэ сөп диэн суруйаллар.

Ол курдук, чинчийиигэ кыттыбыт уонна бу ньыманан туһаммыт дьон  70%-на баттахтара тупсубут. Кинилэр икки ыйы быһа күҥҥэ иккитэ луук суогун испиттэр. Кэтээн көрүү иккис нэдиэлэтигэр баттахтара түспэт, төттөрүтүн, үүнэр буолбут. Бу эмтэнии эр дьоҥҥо ордук туһалааҕа бэлиэтэммит. 

Бастакы ньыма. Луугу ыраастыыбыт уонна кыра гына кырбыыбыт. Суогун ыган таһаарабыт. Онуоха комбайны, блендери, түөркэни туһаныахха сөп.

Суогу куйахаҕытыгар эбэтэр тараҕайдаммыт сирдэргитигэр соттуҥ. 15 мүн. эбэтэр онтон уһуннук тута түһүҥ. Ол кэнниттэн шампунунан суунуҥ.

Бу эмтэниини быраҕан кэбиспэккэ, сүрэҕэлдьээбэккэ, хас күн аайы хатылааҥ.

Иккис ньыма. Ыстакаан ¼  луук суогун ылан, 1 остолобуой ньуоска мүөтү кытта булкуйабыт (өссө элбэх наада буоллаҕына, икки төгүл эбэбит). Бу сириэстибэни куйахабытыгар аччаабыта чаас аҥаара тутабыт. Душтанарга кэтиллэр анал бэргэһэни кэтиэххитин уонна түүнү быһа тутуоххутун сөп. Ол кэннэ шампунунан сууйаҕыт.  

Бу туох даҕаны химията суох эмтэнии, онон түмүгэ тута биллибэт, кыратык тулуйа түһүҥ. Икки ыйынан баттаххыт биллэ тупсуоҕа. Бу ньыманы күн аайы (эбэтэр нэдиэлэҕэ үстэ) туһаныҥ.

Аны туран, луукка аллергиялаах буоллаххытына, эһиэхэ көҥүллэммэтин өйдөөҥ.