Бастыҥ пааматынньыгы талабыт

Бу күннэргэ өрөспүүбүлүкэ олохтоохторо сайт нөҥүө Саха сирин бастыҥ пааматынньыгын быһаараллар. Куоластааһын 100yakutia.ru сайтка ыытылла турар.

Тэрийээччилэр иһитиннэрбиттэринэн, бу 12 пааматынньык Саха сиригэр бэлиэ суолталаах. Ол ханнык эбийиэктэрий? Холобур, күүстээҕинэн-уохтааҕынан албан аатырбыт, суон сураҕырбыт Майаҕатта Бэрт Хараҕа  (Уус Алдан), норуот ырыаһыта Сергей Зверев-Кыыл Уолугар (Сунтаар), национальнай дьоруой Манчаары Баһылайга (Мэҥэ Хаҥалас) аналлаах уо.д.а. пааматынньыктар бааллар. Куоластааһыҥҥа Дьокуускай куораттан Ийэҕэ аналлаах пааматынньык киирбит. Маны сэргэ, балыксыт оҕоҕо (Таатта), Дьөһөгөй Айыы оҕотугар (Хаҥалас), Өлүөнэ эбэҕэ (Өлүөхүмэ), табаһыттарга (Нерюнгри) аналлаах эбийиэктэргэ куоластыахха сөп. Толору испииһэги 100yakutia.ru сайтка   «Опросы» диэн салааҕа киирэн көрүҥ.  

Кэнники кэмҥэ дойду үрдүнэн ураты арт-эбийиэктэри быһаарар  араас куоластааһын ыытыллар. Маннык ис хоһоонноох күрэхтэр дьону-сэргэни түмэр, сомоҕолуур аналлаахтар.

Куоластааһын олунньу 28 күнүгэр түмүктэнэр. Ханнык пааматынньык кыайыылаах буолбутун кулун тутар ыйга билиэхпит.

Көхтөөхтүк кыттыҥ!