Бастакы норуоттар икки ардыларынааҕы кинигэ дьаарбаҥката күүтэр

Дьокуускай куораттааҕы SMART библиотекаҕа уонна Орджоникидзе болуоссатыгар бэс ыйын 27-28 күннэригэр Олохтоох дьаһалта уонна Арассыыйатаҕы ыччат судаарыстыбаннай библиотекатын өйөбүллэринэн «Книжный ветер» Бастакы норуоттар икки ардыларынааҕы кинигэ дьаарбаҥката буолаары турар. 
Дьокуускай куорат библиотекаларын ситимин дириэктэрэ Нюургуяна Решетникова иһитиннэрбитинэн, дьаарбаҥка сарсыарда 11:00 чаастан киэһэ 19:00 чааска диэри үлэлиэҕэ. Сүрүн тэрээһиннэр күнүс 12:00 чаастан Орджоникидзе болуоссатыгар уонна SMART-библиотекаҕа былааннаналлар. Тэрээһин чэрчитинэн кинигэ быыстапката, маастар-кылаастар, суруйааччылары кытта көрсүһүүлэр, араас күрэхтэр ыытыллыахтара. Итини сэргэ бэс ыйын 27 күнүгэр улаатан эрэр оҕолорго аналлаах литератураны кытта үлэ тиэмэтигэр саха мифологиятыгар олоҕурар «Солнце в силках» фэнтези ааптара Марина Сычева бэйэтин уопутун үллэстиэҕэ, «От идеи до книги» маастар-кылаас ыытыаҕа, диэн иһитиннэрэр Дьокуускай куорат библиотекаларын ситимэ