Балет оскуолатыгар бастакы Оҕо театра аһылынна

Аксения уонна Наталья Посельскайдар ааттарынан балет оскуолатыгар өрөспүүбүлүкэҕэ аан бастакы Оҕо театра аһылынна. Ити хардыы талааннаах оҕолору булааһын уонна өйөбүл регионнааҕы киинин  «Искусство» хайысхатын үлэтин саҕаланыытынан буолла. 
Театр «Үөрэҕирии» национальнай бырайыак «Хас биирдии оҕо ситиһиитэ» федеральнай бырайыагын чэрчитинэн тэриллибит. СӨ вице-премьера Сергей Местников Саха сирин бары нэһилиэнньэлээх пууннарыгар өйөбүлгэ наадыйар талааннаах оҕолор баалларын бэлиэтээбит. 
«Талааннаах оҕолору булуу уонна өйөөһүн, инники сайдыыларыгар көмөлөһүү олус наадалаах. Талааннаах оҕолору булааһын уонна өйөбүл региональнай киинэ ол иһин тэриллибитэ.  Бүгүн регионнааҕы киин аһыллыыта буолла. «Үөрэҕирии» национальнай бырайыак чэрчитинэн балет, Үрдүкү музыкальнай, профильнай оскуолалар материальнай-техническэй базаларын тупсарабыт. Ити үөрэҕирии систиэмэтин сайдыытыгар төһүү күүһүнэн буолуоҕа. Хас биирдии оҕо ситиһиитэ – өрөспүүбүлүкэ бүттүүнүн ситиһиитэ. Өрөспүүбүлүкэ инники сайдыытын, экэниэмикэтин талааннаах оҕолору булааһыны уонна өйөбүлү кытта сибээстиибит», – диир Сергей Местников.
СӨ үөрэҕириигэ уонна наукаҕа миниистирэ Михаил Сивцев иһитиннэрбитинэн, Саха сиригэр талааннаах оҕолору булан өйүүргэ саҥа систиэмэнэн үлэ саҕаламмыт. 
«Сүрүн сыалбыт – хас биирдии нэһилиэнньэлээх пууннарга оҕолору көрөн талааннары арыйыы уонна сайдалларыгар көмөлөһүү.  Ити хайысханан 90-с сылларга күүстээх акылаат ууруллубута, онон билигин саҥа тыыны ылар. Бүгүҥҥү күҥҥэ балет оскуолата искусство киининэн буолар. Атын хайысхаларынан уонна нэһилиэнньэлээх пууннарынан тирэх кииннэр тэриллэллэр. Сыл бүтүөр диэри Өктөмҥө наука Аччыгый академиятын үөрэтэр-лабораторнай корпуһун үлэҕэ киллэриэхтээхпит. Ити барыта оҕолор тустарыгар, кинилэр манна сайдалларын уонна инники хардыылыылларын курдук», – диэтэ  миниистир.