Баһылык тус приемугар элбэх боппуруос көрүлүннэ

Балаҕан ыйын 16 күнүгэр куорат баһылыга Евгений Григорьев нэһилиэнньэни кытта уочараттаах көрсүһүүтэ буолан ааста. Тус приемҥа кэлбит дьон чуолаан сир уонна спорт сайдыытын боппуруостарын көтөхтүлэр.

Саад-оҕуруот табаарыстыбатын бэрэссэдээтэлэ А. Дыдаев сорох учаастактарын уу ыларын, сири көҥүлэ суох иҥэринии баарын үҥүстэ.

Куораты тутуу уонна тырааныспар инфраструктуратын департаменын начаалынньыга Иван Гуляев быһаарбытынан, СОТ сиригэр уу сүүрэр турбата туруоруллубут, онтон сылтаан уу тахсар эбит. Евгений Григорьев бэрэбиэркэ ыытарга Олохтоох дьаһалтаҕа сайабылыанньа суруйарга этии киллэрдэ.

Куорат олохтоохторо А. Алексеев уонна С. Монурин «Туймаада» стадиоҥҥа пааматынньыктар бөлөхтөрүн туруорарга сирдэ биэриҥ диэн көрдөһөллөр. Кинилэр өссө Кыайыы пааркатыгар «Алеша» тааҥканы туруоруохха сөбүн-суоҕун интэриэһиргээтилэр. Онуоха бу боппуруоһу өрөспүүбүлүкэ туһааннаах биэдэмистибэлэрин кытта быһаарыахха наада диэн буолла.

«Пааматынньыктары туруоруу туһунан боппуруоһу Дьокуускай куорат Дууматыгар киллэриэхпитин сөп», – диэтэ Евгений Григорьев.

Анал байыаннай дьайыы кыттыылааҕын ийэтэ Тамара Ч. сир учаастагын араарсыы (межевание) уонна уолун массыыната турар гарааһын учаастагын докумуоннаһыы боппуруостарынан кэлбит. Евгений Григорьев Губинскай уокурук управатыгар көҥүлэ суох турар гараастары тиэйтэрэн, учаастагы босхолуурга соруйуом диэн хоруйдаата.  

Остуол тенниһин бэтэрээннэрэ Василий Данилов, Ньургун Карпов уонна Дьокуускай куорат остуол тенниһигэр федерациятын салайааччыта Михаил Аксенов спорт бу көрүҥүнэн дьарыктанарга саалата биэриҥ диэн көрдөһүүлээх кэлбиттэр.

Евгений Григорьев «Спортивнай» дьоҕус түөлбэҕэ спорт комплекса үлэҕэ киирдэҕинэ, икки саалаттан биирин остуол тенниһигэр биэриэххэ сөп диэн эрэннэрдэ.   

Санатан эттэххэ, киин куорат баһылыгар тус приемҥа эрдэттэн суруйтаран киириэххэ сөп. Онуоха Сурук отделыгар эбэтэр Олохтоох дьаһалта тэрилтэлэригэр сайабылыанньа суруйуохха наада. Онно боппуруоһу сиһилии ыйыллар уонна инники өттүгэр туох быһаарыы ылыллыбытын (оннук баар буоллаҕына) суруллар. Маны сэргэ тус дааннайдары ыйар ирдэнэр: төлөпүөн нүөмэрэ, электроннай эбэтэр почтовай аадырыс.

Сайабылыанньаны ыытар ньымалар:

– yakutsk@yakadm.ru Олохтоох дьаһалта официальнай электроннай почтатыгар;

– Дьокуускай к., Ленин проспега, 15 почтовай аадырыска суруйан;

– Сурук отделыгар тиийэн: Дьокуускай к., Ленин проспега, 15, 109 кэб., үлэ күннэригэр сарсыарда 09:00 чаастан киэһэ 18:00 чааска диэри (эбиэккэ тохтобул – 13:00-14:00 чч.).

Тус прием туһунан 40-80-76 төл. эрийэн ыйыталаһыахха сөп.