05.12.2020 | 17:06

Баһылык Тулагыга ыытыллыбыт үлэ туһунан кэпсээтэ

Баһылык Тулагыга ыытыллыбыт үлэ туһунан кэпсээтэ
Ааптар: Киин Куорат
Бөлөххө киир

Биһиги хаһыаппытыгар нэдиэлэ аайы "Баһылыктан ыйыт" рубрика үлэлиир. Ыйытыыларгытын эрэдээксийэ бассаабыгар 8-914-270-64-04 ыытыаххытын сөп. Ааспыкка куорат баһылыга Сардана Владимировна Авксентьева Гагаринскай уокурук, Марха микрооройуонун олохтоохторун ыйытыыларыгар хоруйдаабыта. Бу сырыыга Тулагыга туох үлэ ыытыллыбытын кылгастык кэпсиир.

–Суол үлэтин туһунан кылгастык кэпсии түһүөҥ дуо?

–“Куттала суох уонна хаачыстыбалаах айан суоллара” национальнай бырайыак чэрчитинэн нэһилиэк үс уулуссатыгар өрөмүөн үлэтэ ыытылынна: Тулагыга Порядин, Связистар уулуссалара, Сыырдаахха Уваровская уулуссата – уопсайа 2,8 км. Бу күннэргэ Тулагыга саамай уһун (4 км) Николаев уулуссатын өрөмүөнүн аукциона түмүктэниэхтээх. Маны сэргэ, икки кэнники сылга нэһилиэк суолун-ииһин ­көрүүгэ-истиигэ 2 мөлүйүөн солкуобай кэриҥэ үп тыырыллыбыта. Ол курдук, Тулагыга, Сыырдаахха, Капитоновкаҕа уонна Киллэмҥэ 8 км кэриҥэ суол грейдердэммитэ уонна өрөмүөннэммитэ. Быйыл “Сырдык киин куорат” бырагыраама чэрчитинэн Тулагыга Связистар уулуссаларыгар эбии 25 саҥа баҕана туруорулунна.

–Олохтоохтор тугу туруорсалларый?

–Үгүс сыл устата Сыырдаах олохтоохторо Кымньыылаах күөлү харыстыыр, уута туоларын туһунан туруорсубуттара. 2019 сылга бүддьүөккэ 1 мөлүйүөн солкуобай кэриҥэ харчы көрүллүбүтэ, онон уу оборторор носуос таҥыллан, быйыл үлэҕэ киирдэ.

Соторутааҕыта Киллэмҥэ Наадьылы үрэҕи туоруур муоста туруорулунна. Онон олохтоохтор оптуобус тохтобулугар диэри суоллара кылгаата.

Бэтэрээннэр уонна инбэлииттэр дьиэлэрин тупсарыы бырагырааматын чэрчитинэн, кэнники икки сылга 18 дьиэ толору хааччылынна.

–Нэһилиэк сайдыытыгар туох үлэ ыытылларый?

–Нэһилиэк улаатар, кэҥиир, саҥа ыал элбиир. Онон элбэх оҕолоох ыаллар микрооройуоннарын сайыннарыыга эбии үп көрүллэрэ былааннанар. 2020 сыл ахсынньы 1 күнүнээҕи туругунан, манна 240 элбэх оҕолоох ыал олорор, онтон 25 дьиэ кэргэн (66 оҕо) киин куорат босуобуйатын ылар. Былырыын Сыырдаахха 240 миэстэлээх оҕо уһуйаанын үөрүүлээх быһыыга-майгыга аспыппыт. Тулагы оскуолатыгар “Точка роста” киин тэриллибитэ. Быйыл “Кэнчээри” уһуйаан акылаатын бөҕөргөтөр үлэ ыытылынна.

Нэһилиэк актыбыыстара араас субуотунньуктары көҕүлүүллэр. Холобур, былырыын ыраастааһын үлэтигэр 1239 киһи (!) тахсыбыта. Быйыл кылгас кэм иһигэр субуотунньук 49 төгүл ыытылынна. Маладьыастар! Эһигинэн киэн туттабын!

Нэһилиэк баһылыга Егор Гаврильевич Попов – уопуттаах салайааччы, сир боппуруостарын үгүстүк туруорсар. Кырдьыга даҕаны, Тулагы-Киллэм Дьокуускай куораты уонна чугас улуустары тыа хаһаайыстыбатын бородууксуйатынан хааччыйан олорбут “Якутскай” сопхуостан илдьэ хаалбыт нэһилиэстибэтин билиҥҥэ диэри тутан олорор нэһилиэк быһыытынан биллэр. Егор Гаврильевиһы идэтигэр бэриниилээх үлэһит, ону таһынан киһи быһыытынан үтүө өрүттэрин – чиэһинэй, сиэрдээх, эппиэтинэстээх кэллиэгэ диэн бэлиэтиэхпин баҕарабын.          

Сонуннар

Ордук ааҕаллар

Сири иилии эргийиэм!
Дьон | 12.04.2024 | 18:00
Сири иилии эргийиэм!
Кэбээйи Арыктааҕыттан төрүттээх Иннокентий Ноговицын бэлисипиэтинэн аан дойдуну биир гына айанныыр хоббилааҕын туһунан хас да сыллааҕыта суруйан турабыт. Иннокентий киһини кытта кэпсэтэригэр элбэх ууну-хаары эрдибэккэ, аҕыйах тылынан чуо ыйытыыга эрэ хоруйдуурун  билэр буоламмын, Кытайга тиийбититтэн саҕалаан, бассаабынан элбэх да элбэх ыйытыыларбынан көмөн туран, наадалаах информациябын хостоон ыллым. Кинини ыра санаатын...
Зоя Желобцова:  «Олох толору үөрүүтүн, кэрэтин билэн сылдьабын»
Дьон | 11.04.2024 | 10:00
Зоя Желобцова: «Олох толору үөрүүтүн, кэрэтин билэн сылдьабын»
«Үчүгэй киһи» диэн хайдах киһини ааттыылларый? Арааһа, бастатан туран, дьоҥҥо эйэҕэс, аламаҕай, үөрэ-көтө сылдьар, барыга-бары кыһамньылаах, үлэһит киһини ааттыыр буолуохтаахтар. Дьэ, оччотугар, биһиги дьүөгэбит Зоя Константиновна Желобцова онуоха сүүс бырыһыан эппиэттэһэр. Киһи киһитэ буоллаҕа биһиги Зоябыт!   Оттон киһи барахсан мутугунан быраҕар муҥур үйэтигэр дьонугар-сэргэтигэр, ыччаттарыгар хайдах суолу-ииһи, ааты, өйдөбүлү хаалларара...
«Доҕордоһуу» — оҕо саас ыллыга
Сонуннар | 11.04.2024 | 18:00
«Доҕордоһуу» — оҕо саас ыллыга
Бу күннэргэ өрөспүүбүлүкэҕэ бастакынан тэриллибит “Доҕордоһуу” оҕо үҥкүү норуодунай ансаамбыла 55-с сылын бэлиэтээтэ. Өрөспүүбүлүкэ үҥкүүтүн эйгэтигэр суолу тэлбит ансаамбыл үөрүүлээх тэрээһинин туһунан санаа атастаһыыларын ааҕыҥ.
Нэһилиэстибэ тула
Тускар туһан | 11.04.2024 | 12:00
Нэһилиэстибэ тула
Киһи бу олохтон барыыта, ыал арахсыыта, төрөппүтэ суох хаалыы – орто дойду сокуоннара. Онуоха биһиги сорох ардыгар хойутаан нэһилиэстибэни оҥотторор түгэммит баар. Өскөтүн кэргэниҥ, ийэҥ, аҕаҥ, чугас киһиҥ суох буоллаҕына, кини нэһилиэстибэтин алта ыйынан сокуонунан оҥотторуохтааххын.   Билэр чугас дьонум аҕалара орто дойдуттан барбытын кэннэ хас да сыл буолан баран биирдэ...