Баһылык Строительнай уокурук олохтоохторун кытта көрүстэ

Атырдьах ыйын 26 күнүгэр киин куорат баһылыга Евгений Григорьев Строительнай уокурук олохтоохторун кытта көрсөн, Дьокуускай маастар-былаанын олоххо киллэрии хаамыытын кэпсээтэ, ыйытыыларга хоруйдаата.

2030 сылга диэри маастар-былаан иитинэн куорат бу уокуругар тиэргэннэри тупсарыы үлэтэ ыытыллыахтаах, хаарбах туруктаах 253 элбэх кыбартыыралаах дьиэ олохтоохторо көһөрүллүөхтээхтэр, 240 миэстэлээх Физико-техническэй лицей эбии дьиэтэ тутуллуохтаах, ону сэргэ 990 миэстэлээх саҥа оскуола уонна 240 миэстэлээх икки оҕо уһуйаана дьэндэйиэхтээхтэр. Маны таһынан 500 миэстэлээх Оҕо искусствотын оскуолата тутуллара былааннанар.

Уокурук олохтоохторун тиэргэннэри өрөмүөннээһин уонна тупсарыы, суол-иис туруга, ардах уутун аһардыы курдук тыын боппуруостар долгуталлар. Дьон элбэх кыбартыыралаах дьиэлэри салайар хампаанньалары, түүннэри утуппакка сордуур суоппардары  үҥүстүлэр.

Маны таһынан, көрсүһүүгэ «Подснежник» уһуйааҥҥа киирэр суолу оҥоруу туһунан ыйытыы киирдэ. Биир кыттааччы Хапытаалынай өрөмүөн пуондата Петр Алексеев уул., 10, балконнары куһаҕаннык өрөмүөннээбитин үҥүстэ. Итини сэргэ биир кыттааччы «Улыбка» уһуйаан таһыгар олус элбэх массыына тохтуурун бэлиэтээн туран, аттынааҕы дьиэлэргэ олорор сатыы дьоҥҥо куттал суох буолуутун хааччыйыахха наада диэн этиилээх.

«Мин маннык көрсүһүүлэргэ элбэхтик сылдьабын, маннык тэрээһиннэргэ туһааннаах тэрилтэлэртэн үлэһиттэр кэлэллэрэ үчүгэй, кинилэр дьону долгутар ыйытыыга сөптөөх хоруйу эбэтэр сүбэ-ама биэриэхтэрин сөп», – диэн санаалаах Строительнай уокурук олохтооҕо Елена Гапон.

Киирбит ыйытыы барыта боротокуолга киирэр уонна хонтуруолга ылыллар. Нэһилиэнньэни кытта көрсүһүүлэр куорат атын уокуруктарыгар салгыы ыытыллаллар. 

Хаартыска: Олохтоох дьаһалта пресс-сулууспата