Баһылык Евгений Григорьев «Водоканал» кэлэктиибин кытта көрүстэ

Тохсунньу 20 күнүгэр баһылык Евгений Григорьев быйылгыттан олоххо киирбит көрүҥ быһыытынан ааспыт 2022 сыллааҕы үлэ түмүгүн уонна 2023 сыл соруктарын туһунан «Водоканал» АУо кэлэктиибин иннигэр кэпсээтэ.
Баһылык үлэ кэлэктиибин үүммүт 2023 сылга олох-дьаһах хомунаалынай хаһаайыстыбатын эйгэтигэр турар соруктары кытта билиһиннэрдэ. Ол курдук, 3№-дээх коллектор, 5 №-дээх уу ситимин тутуу, социальнай гаастааһын, Воинская, 10/1, 10/2 уонна Билибин, 13 аадырыстары уу кииннэммит тиһигэр холбооһун, Табаҕаҕа уонна Кангалааска канализация станцияларын тутуу курдук элбэх үлэ турарын иһитиннэрдэ. Итиэннэ: «Нэһилиэнньэ олоҕун хаачыстыбата өҥөнү оҥорор тэрилтэлэртэн быһаччы тутулуктаах, онон биһиги сорукпут – биир өйүнэн-санаанан үлэлээн, олох хаачыстыбатын үрдэтэргэ кыһаллыы», – диэн туран, «Водоканал» АУо уонна генеральнай дириэктэр Анатолий Кырджагасовка чуолаан канализация люктарын боппуруоһугар бииргэ үлэлэһии ситиһиллибитинэн махталын биллэрдэ.
Көрсүһүү иитинэн тэрилтэ үлэһиттэрэ куорат баһылыгыттан интэриэһиргиир кыһалҕаларын ыйыталастылар. Ол иһигэр «Водоканал» тэрилтэ таһыгар Б. Чижик уулуссатыгар сылаас тохтобулу тутууну, Ефимов уул., Халтурин уул. Строителей уулуссаттан Якутскаяҕа диэри кэрчигин өрөмүөнүн, уопсастыбаннай тырааныспар интервалын о.д.а. ыйыталастылар.