«Баһаары сэрэт – АДПИ туруортар!» аахсыйа салҕанар

Санатар буоллахха, «Баһаары сэрэт – АДПИ туруортар!» аахсыйа өрөспүүбүлүкэҕэ быйыл кулун тутар 21 күнүттэн саҕаланна уонна ахсынньы 31 күнүгэр диэри ыытыллар. Тэрийээччи – СӨ Нэһилиэнньэ олоҕор куттал суоһаабатын хааччыйар судаарыстыбаннай кэмитиэт.

Территориялары кытта үлэлиир Департамент начаалынньыга Владислав Слепцов бэлиэтээбитинэн, Олохтоох дьаһалта «Баһаары сэрэт – АДПИ туруортар!» аахсыйаҕа иккис сылын кыттар.

«Куорат салалтатын көҕүлээһининэн былырыын элбэх оҕолоох дьиэ кэргэттэргэ, соҕотох олорор саастаах гражданнарга, доруобуйаларынан хааччахтаах дьоҥҥо уонна уустук балаһыанньаҕа киирбит ыалларга 155 автономнай буруону сэрэтэр тэрил туруоруллубута», - диэн бэлиэтиир Владислав Слепцов.

Нэһилиэнньэни көҕүлүүр ыҥырыы-«челленджы» Территориялары кытта үлэлиир Департамеҥҥа куорат баһылыгын солбуйааччыта Егор Кардашевскай биэрдэ. Владислав Слепцов социальнай аахсыйа эстафетатын салалта территориальнай уорганнарыгар туттарда.

Манна даҕатан эттэххэ, АДПИ (Автономный дымовой пожарный извещатель) – кыра да умайыы сибикитэ баар буоллаҕына улаханнык тыаһаан биллэрэр тэрил. Инньэ гынан түүн да, күнүс да сэрэтэн дьон олоҕун быыһыыр кыахтаах.

Ыҥырыы-«челленджка» ким баҕалаах кыттыан сөп. Кыттааччы АДПИ-ны дьиэтигэр туруорар, видеоҕа устар уонна ВКонтакте социальнай ситимҥэ @goskomobzh_yakutia диэн бэлиэлээх уонна #предупредиАДПИ хэштегтээх угар. Ити кэнниттэн эстафетаны бэйэтин билэр дьонугар ыыталыыр. Киһи ахсааныгар хааччахтааһын суох.

Аахсыйа кыттааччылара оонньууга кытталлар, усулуобуйата:

- ВКонтакте социальнай ситимҥэ СӨ Госкомобеспечение @goskomobzh_yakutia бөлөҕөр сурутуу;

- Оонньуу ыытыллар күнүгэр кыттааччы ВКонтакте социальнай ситимҥэ сирэйэ аһаҕас буолуохтаах;

- Оонньуу туһунан таһаарарга @goskomobzh_yakutia #предупредиАДПИ хэштегтээх бэлиэтииллэр.

2023 сыл ахсынньы 1 күнүгэр түбэһиэх сыыппаралар генератордарын көмөтүнэн оонньуу сүрүн кыайыылааҕын уонна үс бириискэ тиксибиттэр ааттара биллиэҕэ, кинилэргэ сыаналаах бириистэри туттарыахтара.