Баһаартан сэрэхтээх буоларга – саҥа тиэхиньикэ
Баһаартан сэрэхтээх буолар кэмҥэ бэлэмнэнии биир миэрэтинэн цистерналаах тырааныспары уонна ыарахан уйуктаах тиэхиньикэни ыларга 139 мөл. солк. бэриллибитэ буолар. Үс сыл иһигэр баһаарынай чаастарга аналлаах тиэхиньикэни атыылаһыыга 361 мөл. солк. көрүллүбүт, эрдэттэн федеральнай күүстэри кытта хардарыта дьайсыы боппуруоһа дьүүллэһиллибит. Саха сирин үпкэ миниистирэ Валерий Жондоров социальнай ситимнэргэ баһаартан сэрэхтээх сезоҥҥа бэлэмнэнии чэрчитинэн ыытыллар тэрээһиннэр тустарынан кэпсээбит.
«2021 сылга Саха сирин территориятыгар улахан баһаардары кытта көрүстүбүт. Сезон түмүгүнэн Саха сирин баһылыга, 2022 сылга баһаартан сэрэхтээх буолар кэмҥэ бэлэмнэниини саҕалыыр курдук, быйыл икки улахан мунньаҕы ыыппыта. Бастакытынан, тиэхиньикэнэн хааччыллыы быһаарыллыбыта. Баһылык Айсен Николаев Арассыыйа бырабыыталыстыбатыгар эбии тиэхиньикэни – цистерналаах тырааныспары уонна ыарахан уйуктаах тиэхиньикэни биэрэллэрин курдук туруорсубута, быйыл итиннэ 139 мөл. солк. көрүлүннэ, атыылаһан эрэллэр», — диэн бэлиэтээбит Валерий Жондоров.
Быйыл баһаарынай чаастарга аналлаах тиэхиньикэни атыылаһыыга үс сылга 361 мөл. солк. көрүллүбүт. Федеральнай күүстэри кытта хардарыта дьайсыы боппуруоһа эрдэттэн дьүүллэһиллибит.
«Өрөспүүбүлүкэ баһылыгын, бырабыыталыстыбатын уонна экология Министиэристибэтин дьаныардаах үлэлэрин түмүгүнэн ойуур баһаардарын умуруорарга федеральнай бүддьүөт субвенциятын үрдээһинэ буолар. Итинэн сибээстээн кэлэр сылга сэрэтэр үлэ тупсуоҕа, ол иһигэр ойууртан чугас нэһилиэнньэлээх пууннарга, ону сэргэ балаһа кэтитин норматива улаатта», — диэбит миниистир.