Баһаарга үлэлээбит волонтердар доруобуйаларын бэрэбиэркэлии медиктэр кэллилэр

Балаҕан ыйын 14 күнүгэр Дьокуускайга Федеральнай медико-биологическай агентство биригээдэтэ кэллэ. Медиктэр баһаары умуруорууга кыттыбыт волонтердар доруобуйаларын туругун көрүөхтэрэ. Федеральнай Сибиирдээҕи научнай-клиническэй киин генеральнай дириэктэрэ Борис Баранкин СӨ премьера Андрей Тарасенколыын көрүстэ. СӨ доруобуйа харыстабылыгар Министиэристибэтэ иһитиннэрбитинэн, сэрэтэр хайысхалаах медицинскэй көрүү испииһэгэр өрөспүүбүлүкэ 500-тэн тахса олохтооҕо киирбит. 
Бу иннинэ өрөспүүбүлүкэ бырабыыталыстыбата Федеральнай медико-биологическай агентствотыттан медицинскэй тэрилтэлэргэ көмө быһыытынан биригээдэлэри ыытарыгар көрдөспүт.   Федеральнай медико-биологическай агентство салайааччыта Вероника Скворцова өйөбүлүнэн Саха сиригэр Сибиирдээҕи научнай-клиническэй киин быраастара уонна медсиэстирэлэрэ састааптаах 13 киһилээх биригээдэ кэлэн атырдьах ыйын 24 күнүттэн балаҕан ыйын 24 күнүгэр диэри Дьокуускайдааҕы өрөспүүбүлүкэ клиническэй балыыһатыгар уонна Мирнэйдээҕи киин балыыһаҕа үлэлии сылдьаллар. 

Бүгүн эбии сэттэ киһилээх биригээдэ баһаары умуруорууга кыттыбыт волонтердар доруобуйаларын туругун көрө-истэ кэллэ. Федеральнай Сибиирдээҕи научнай-клиническэй киин генеральнай дириэктэрэ Борис Баранкин СӨ премьера Андрей Тарасенколыын көрүстэ.
«Бүгүн сарсыарда көтөн кэлбит биригээдэ баһаары умуруорууга кыттыбыт волонтердары диспансеризациялыаҕа. Итини сэргэ медиктэр Горнай оройуонугар барыахтара. Биригээдэ икки нэдиэлэ үлэлиэҕэ. Регион доруобуйа харыстабылыгар Министиэристибэтэ биһиэхэ олус үчүгэй усулуобуйаны тэрийдэ, олорор сиринэн уонна аһылыгынан хааччыйда. Онон улахан махталбытын тиэрдэбит», – диэтэ  Баранкин.
Биригээдэ састаабыгар специалистар – эндокринолог, оториноларинголог, офтальмолог, невропатолог, терапевт быраастар уонна икки медсиэстэрэ бааллар. Медицинскэй көрүүнү 500 киһи ааһыахтаах.
Андрей Тарасенко бэлиэтээбитинэн, өрөспүүбүлүкэҕэ ойуур баһаарын кытта охсуһуу кыттыылаахтарын доруобуйаларын чинчийии ыйа тэриллибит. Дьокуускайга медицинскэй сэрэтэн көрүү 3 №-дээх Дьокуускайдааҕы куорат балыыһатын базатыгар ыытыллыаҕа.