Бүтүн Арассыыйатааҕы Сүрэх күнүгэр анаммыт нэдиэлэ ыытыллар

Нэдиэлэ чэрчитинэн чөл олоххо, доруобуйаны чэбдигирдиигэ туһуламмыт медицинскэй, информационнай-сырдатар тэрээһиннэр, аһаҕас аан күннэрэ, «Здоровое сердце семьи» аахсыйа ыытыллаллар.

Кэнники сылларга сүрэх-тымыр ыарыыларын сэрэтии уонна эмтээһин доруобуйа харыстабылын эйгэтин сүрүн хайысхатынан буолла. Санатар буоллахха, киин куоракка 2022 сыллаахха Сүрэх-тымыр киинэ үлэҕэ киирбитэ.

«Саха сирин Ил Дархана өйөбүлүнэн арыллыбыт үрдүк технологиялаах Сүрэх-тымыр киинэ баар буолан, тыһыынчанан ыарыһахтарга көмөнү оҥорор, сүүһүнэн киһини эпэрээссийэлиир кыахтанныбыт. Өрөспүүбүлүкэҕэ сүрэх-тымыр ыарыытыттан өлүү лаппа намтаата, үлэбит салҕанар. Бу ыытылла турар нэдиэлэ нэһилиэнньэбит олоҕун хаачыстыбатын уонна доруобуйатын тупсарыыга дьоһун суолталаах хардыынан буоларыгар эрэнэбин», - диэтэ доруобуйа харыстабылын миниистирэ Лена Афанасьева.

Сүрэх-тымыр киинэ аһыллыаҕыттан 6 тыһыынчаттан тахса киһи эмтэннэ, 500-чэ сүрэх, тыһыынчаттан тахса эндоваскулярнай эпэрээссийэлэр, 2842 теле-ЭКГ оҥоһулуннулар. Итини таһынан 28 медицинскэй тэрилтэ 50 теле-ЭКГ аппаратынан хааччылынна.

Нэдиэлэ устата поликлиникаларга аҕам саастаах дьон хааннарын баттааһынын кээмэйдииллэр, сүрэх эмискэ ыарыйдаҕына уонна инсульт түбэлтэтигэр хайдах бастакы көмөнү оҥорорго үөрэтэллэр.

Балаҕан ыйын 29 күнүгэр Бүтүн Арассыыйатааҕы сүрэх күнэ бэлиэтэнэр. Итинэн сибээстээн Дьокуускай телебашнята кыһыл өҥүнэн умайыаҕа.