Бүтүн Арассыыйатааҕы куоластааһыҥҥа анаан мурал уруһуйдаатылар

Дойду төрүт сокуонугар киирэр уларытыылары талыы бүтүн Арассыыйатааҕы куоластааһыны көрсө, Дьокуускай уонна Жатай дьиэлэрин истиэнэлэригэр дьэрэкээн өҥнөөх уруһуйдар баар буоллулар.

Ааптардар – саха худуоһунньуктара Николай Григорьев уонна Софья Шилова. Куорат эйгэтин боппуруостарынан компетенция киинин кытта бииргэ оҥоһуллубут бырайыакка хас биирдии мурал дойду Төрүт сокуонун көннөрүүтүн кытта ситимнэннэ.

Дзержинскэй аатынан уулуссаҕа турар дьиэ көстүүтүнэн Николай Григорьев дьарыктанна. Бу мурал бастакы уруһуйа сотору кэминэн ыаллыы тутуллуохтаах «Тутааччылар сквердэрин» кытта ситимнээх, онон Дьокуускай олоҕо-дьаһаҕа ойууланар. Иккис уруһуйа төрүт култуураны харыстааһын тиэмэтин арыйар.

Жатай бөһүөлэгэр уруһуйдаммыт Софья Шилова муралын ис хоһооно тулалыыр эйгэҕэ харыстабыллаах сыһыан уонна дьиэ кэргэн көмүскэлигэр сыһыаннаах.