Бүтүн Арассыыйатааҕы биэрэпис болдьоҕо бигэргэтилиннэ

Бүтүн Арассыыйатааҕы нэһилиэнньэ биэрэпиһэ алтынньы 15 күнүттэн сэтинньи 14 күнүгэр диэри ыытыллыахтаах. Сылдьарга эрэйдээх сирдэргэ биэрэпис ахсынньы 20 күнүгэр диэри уһатыллар. Атырдьах ыйын 16 күнүгэр Арассыыйа бырабыыталыстыбатын бэрэссэдээтэлэ Михаил Мишустин «О внесении изменений в постановление правительства Российской Федерации от 7 декабря 2019 г. № 1608» 1347 №-дээх уураахха илии баттаабыт. 
Алтынньы 15 күнүттэн сэтинньи 8 күнүгэр диэри судаарыстыбаннай өҥө Порталыгар киирэн дойду олохтоохторо биэрэпис лииһин бэйэлэрэ толоруохтарын сөп. 
Бүтүн Арассыыйатааҕы биэрэпис барыллаан түмүктэрэ 2022 сыл муус устар ыйыгар тахсыахтара. Бүтэһиктээх түмүктэр 2022 сыл IV кыбаарталга тахсаллар. Бу иннинэ нэһилиэнньэ биэрэпиһэ 2002 уонна 2010 сылларга ыытыллыбыт. 2021 сылга биэрэпиһи ыытыы туһунан быһаарыныыны РФ бырабыыталыстыбата 2020 сыл сайыныгар ылыммыта. 
Росстат салайааччыта Павел Смелов эппитинэн, билиҥҥи кэмҥэ бэлэмнэнии сүрүн үлэтэ түмүктэммит – биэрэпис лиистэрин пуормалара бигэргэтиллибит, биэрэписчиктэргэ анаан регионнарга электроннай планшеттары ыыппыттар, бары таһымнарга биэрэпис хамыыһыйаларын үлэлэрэ тэриллибит, биэрэписчиктэринэн үлэлиэн баҕалаах дьон испииһэктэрэ оҥоһуллубут. Сылдьарга эрэйдээх сирдэргэ биэрэпис саҕаламмыт. 
Бүтүн Арассыыйатааҕы нэһилиэнньэ биэрэпиһэ алтынньы 15 күнүттэн сэтинньи 14 күнүгэр диэри цифровой технологиялары туттан ыытыллыаҕа. Биэрэпискэ сүрүн саҥаны киллэриинэн судаарыстыбаннай өҥө Порталыгар (Gosuslugi.ru) киирэн дойду олохтоохторо биэрэпис лииһин бэйэлэрэ толорор кыахтаналлара буолар. Дьиэлэринэн сылдьалларыгар биэрэписчиктэр анал бырагыраамалаах планшеттары тутталлар. Итини сэргэ биэрэпиһи учаастактарга кэлэн, ол иһигэр судаарыстыбаннай өҥөлөрү оҥорор элбэх функциялаах кииннэргэ уонна «Мои документы» муниципальнай өҥөлөргө ааһыахтарын сөп.