Бүгүҥҥүттэн 1-8 кылаастарга сирэй үөрэнии саҕаланна

Ахсынньы 13 күнүттэн Дьокуускай куорат оскуолаларыгар уонна оскуола иннинээҕи тэрилтэлэригэр үөрэх уонна иитии сирэй көрүҥүнэн сөргүтүлүннэ. Роспотребнадзор ирдэбиллэрэ барыта тутуһуллар. Итинник быһаарыы куорат уокуругун Санитарнай-эпидемиологическай хамыыһыйатын мунньаҕар ылыныллыбыт. Ол туһунан Уокуруктааҕы дьаһалта пресс-сулууспата иһитиннэрдэ. 
Үөрэҕирии тэрилтэлэригэр биирдиилээн куруһуоктар, секциялар, эбии дьарыктар уонна былааннаммыт спортивнай күрэхтэр көҥүллэннилэр.  
Үөрэх уонна иитии коронавирус дьаҥын тарҕаппат сыаллаах санитарнай быраабылалары уонна нормативтары тутуһан ыытыллар. Дезинфекциялыыр сириэстибэлэр туттуулаах генеральнай убуоркалар оскуолаларга, уһуйааннарга уонна да атын үөрэҕирии тэрилтэлэригэр оҥоһуллуохтара. 
Бүгүҥҥүттэн үөрэнээччилэр тырааныспар каарталарын үлэтэ сөргүтүллэр.