Бүгүн РФ Бэрэсидьиэнэ Владимир Путин быһа эпииргэ тахсар

Бүгүн, ахсынньы 14 күнүгэр, Москва бириэмэтинэн күнүс 12.00 чааска, РФ Бэрэсидьиэнэ Владимир Путин сылы түмүктүүр быһа эпиирэ, итиэннэ суруналыыстары кытта пресс-кэмпириэнсийэ буолуоҕа.

Арассыыйа олохтоохторо Бэрэсидьиэҥҥэ 8-800-200-40-40 нүөмэринэн мөлүйүөнтэн тахса ыйытыыны ыыттылар. 0-40-40 нүөмэргэ СМС уонна ММС нөҥүө 434 тыһыынча, «Москва-Путину.ру» сайт нөҥүө 105 тыһыынча ыйытыы киирдэ. «ВКонтакте» уонна «Одноклассники» социальнай ситимнэринэн эмиэ ыытыахха сөп.

Ыйытыыгыт быһа эпииргэ иһиллибэтэҕинэ даҕаны, хайаан даҕаны хоруйдаах буолуо диэн эрэннэрэллэр.  Бэрэсидьиэн пресс-сэкирэтээрэ Дмитрий Песков иһитиннэрбитинэн, Владимир Владимирович билигин ыйытыыларга хоруйдуурга бэлэмнэнэр. Киниэхэ Бүтүн Арассыыйатааҕы норуодунай фронт экспертэрэ көмөлөһөллөр.