Бүгүн куорат баһылыгын бастакы солбуйааччы Евгений Григорьев быһа эфиргэ тахсыаҕа

Бүгүн киэһэ 18.00 чаастан Дьокуускай куорат баһылыгын бастакы солбуйааччы Евгений Григорьев @grigorev_yakutsk бэйэтин аккаунуттан быһа эфиргэ тахсыаҕа, нэһилиэнньэ ыйытыыларыгар хоруйдуоҕа. Баһылык бастакы солбуйааччыта киин куоракка суол тутуутун, хаарбах туруктаах дьиэлэртэн олохтоохтору көһөрүү бырагырааматын, уопсастыбаннай тырааныспар үлэтин туһунан сиһилии кэпсиэҕэ.

“Күндү доҕоттор! Эһиги миигиттэн дьаһалта үлэтин араас хайысхаларыгар сыһыаннаах элбэх ыйытыылары биэрэҕит. Үксүн сиһилии, толору хоруйдары истиэххитин баҕараҕыт. Онон биһиги хамаанданан чопчу тиэмэлэринэн быһа эфирдэри ыытарга сүбэлэстибит. Оччоҕуна эһиги толору хоруйу ылар кыахтаныаххыт”, – диэн Сардана Авксентьева бэйэтин аккаунугар суруйда.

Аныгыскы нэдиэлэҕэ (чуолкай бириэмэтин баһылык биллэриэҕэ) экономиканы, ОДьКХ-ны, социальнай боппуруостары иилиир-саҕалыыр куорат баһылыгын солбуйааччылара быһа эфиргэ тахсыахтара.

“Баһаалыста, эфир тиэмэтигэр сөптөөх ыйытыылары биэриҥ. Куорат олохтоохторугар табыгастаах буоллун диэн хас биирдии эфири бэйэм аккауммар угар буолуом. Оттон кэлэр нэдиэлэ бүтүүтэ эһигини кытта үгэс буолбут көрсүһүүгэ куорат сайдыытын туһунан кэпсэтиэхпит”, – диэтэ Сардана Авксентьева.  

Күндү куорат олохтоохторо! Бүгүн киэһэ 18.00 чаастан @grigorev_yakutsk киирэн быһа эфири көтүппэккэ көрүҥ, кэпсэтиигэ көхтөөхтүк кыттыҥ.